அறிந்து கொள்ள வேண்டிய நாளந்தா பல்கலைக்கழகம்!

அறிந்து கொள்ள வேண்டிய நாளந்தா பல்கலைக்கழகம்!

இந்தியாவின் செழுமையான கல்வி வளர்ச்சிக்கு எடுத்துக்காட்டு நாளந்தா பல்கலைக்கழகம். நாமெல்லாம் மெக்காலே கல்வி முறையின் வாரிசுகள் என்று சொல்லிக் கொண்டாலும் இந்தியாவிற்கென்ற கல்வி முறை இருந்திருக்கிறது என்பதற்கு நாளந்தா பல்கலைக்கழகம் நல்ல சாட்சியம்.

64 துறைகள், 2,000 ஆசிரியர்கள், 10,000 மாணவர்கள் என்று இயங்கிய தொன்மையான பல்கலைக்கழகம்தான் நாளந்தா. உலகின் முதல் பல்கலைக்கழகம் என்ற சிறப்பும் இந்தப் பல்கலைக்கழகத்திற்கு உண்டு.

ஐந்தாம் நூற்றாண்டில் குமார குப்தரால் இப்பல்கலைக்கழகம் ஆரம்பிக்கப்பட்டிருக்கிறது. பின்வந்த ஹர்ஷர் போன்ற அரசர்களாலும் இப்பல்கலைக்கழகம் ஆதரிக்கப்பட்டிருக்கிறது. பனிரெண்டாம் நூற்றாண்டு வரை நாளந்தா பல்கலைக்கழகம் கல்விச் சேவையில் இணையற்றுச் செயல்பட்டிருக்கிறது.

14 ஹெக்டேர் பரப்பளவில் நாளந்தா பல்கலைக்கழகம் செயல்பட்டிருக்கிறது. ஒன்பது மாடிகள் கொண்ட நூலகம் நாளந்தா பல்கலைக்கழகத்திற்கு இருந்திருக்கிறது. அந்த நூலகத்தில் 90 லட்சம் சுவடிகள் வரை நூல்களாக இடம் பெற்றிருக்கின்றன.

சீனப் பயணியான யுவான் சுவாங்கின் குறிப்புகள் நாளந்தா பல்கலைக்கழகத்தைப் பலவிதமாகச் சிறப்பித்துச் சொல்கிறது. பல்கலைக்கழகமாக முழு வளர்ச்சி பெறும் காலத்திற்கு முன்பே நாளந்தா மிகச் சிறந்த கல்வித் தலமாகச் செயல்பட்டிருக்கிறது. அப்போது புத்தர் போன்றோர் நாளந்தாவிற்கு வந்து சென்றிருப்பதை யுவான்சுவாங்கின் குறிப்புகள் காட்டுகின்றன.

இந்தியாவின் மிகச் சிறந்த வானவில் அறிஞரான ஆர்யபட்டர் நாளந்தாவின் மாணவராக அறியப்படுகிறார். நாளந்தா பல்கலைக்கழகத்திலிருந்தே ஆயுர்வேதம் இந்தியா முழுவதும் பரவியிருக்கிறது. தமிழ்நாட்டின் காஞ்சிபுரத்தைச் சேர்ந்த தர்மபாலர் நாளந்தா பல்கலைக்கழகத்தின் தலைவராக இருந்துள்ளார்.

நாளந்தா பல்கலைக்கழகம் புத்த சமயத்தின் மகாயனக் கருத்துகளைச் சிறப்பாகப் போதிக்கமிடமாகக் கருதப்பட்டாலும் அங்கு வேதங்கள், இலக்கணம், தர்க்கம், வானவியல், மருத்துவம் போன்ற பல துறைகள் சிறப்பாகச் செயல்பட்டிருக்கின்றன.

உணவும் இருப்பிடமும் இலவசமாக வழங்கப்பட்டு இப்பல்கலைக்கழகம் அறிவுப் பரப்பில் பெரும் கல்விச் சேவை ஆற்றியுள்ளது. இதற்கென இருநூறு கிராமங்களின் வருவாயைக் கொண்டு நாளந்தா பல்கலைக்கழகம் இயங்கியிருக்கிறது.

இன்று இந்தியர்கள் கல்வி கற்க வெளிநாட்டுப் பல்கலைக்கழகங்களை நாடிச் சென்றாலும், அன்று கிரேக்கம், பாரசீகம், திபெத், சீனா, கொரியா, இலங்கை, ஜப்பான், மங்கோலியா போன்ற நாடுகளில் இருந்து கல்வி கற்க இந்தப் பல்கலைக்கழகத்தை நாடி வந்திருக்கிறார்கள்.

உலகின் சில மோசமான சம்பவங்கள் கல்வி உலகையும் அறிவுப் பரவலையும் மோசமாகப் பாதித்திருக்கிறது. அப்படித்தான் உலகின் பல நூலகங்கள் எரிக்கப்பட்டிருக்கின்றன. பனிரெண்டாம் நூற்றாண்டில் பக்தியார் கில்ஜி என்பவரால் நாளந்தா பல்கலைக்கழகத்தின் நூலகம் எரிக்கப்பட்டிருக்கிறது. மூன்று மாத காலம் வரை நூலகம் எரிந்ததாகத் தகவல்கள் கூறுகின்றன.

முன்னால் குடியரசுத் தலைவர் அப்துல் கலாம் அவர்களின் முனனெடுப்பை ஏற்று 2014 ஆம் ஆண்டிலிருந்து நாளந்தா பல்கலைக்கழகத்தை அதன் பாரம்பரிய பெருமைகளுக்காக இந்திய அரசாங்கம் மீண்டும் புதுப்பித்துத் தொடங்கியுள்ளது. தற்போது இந்தப் பல்கலைக்கழகம் 450 ஹேக்டேர் பரப்பில் செயல்படுகிறது.

நாளந்தா பல்கலைக்கழகத்தை யுனெஸ்கோ உலக பாரம்பரியக் தளங்களில் ஒன்றாக அறிவித்திருக்கிறது.

இப்படிப்பட்ட நாளந்தா பல்கலைக்கழகத்தைப் பற்றி நாமெல்லாம் அறிந்து வைத்திருப்பது அவசியம்தானே!

*****

ஏன் தேவைப்படுகிறது இரண்டாவது வருமானம்?

ஏன் தேவைப்படுகிறது இரண்டாவது வருமானம்?

ஒன்றுக்கு இரண்டாக இருந்தால் நல்லதுதானே. ஒன்று உதவாவிட்டாலும் இன்னொன்று உதவும். இப்படி துணைவர், துணைவி தவிர மற்ற எல்லாம் இரண்டாக இருந்தால் நல்லதுதான். ஊதியமும் அப்படி இரண்டாக இருந்தால் செலவினங்களுக்கு உதவியாக இருக்கும்.

முதல் வேலையோடு இரண்டாவதாக ஒரு பகுதி நேர வேலையை வைத்துக் கொள்வது இரண்டாவது வருமானம் பெறுவதற்கு உதவியாக இருக்கும்.

பகதி நேர வேலைதான் என்றில்லை. வீட்டைக் கட்டி வாடகைக்கு விடுவதும் இரண்டாவது வருமானத்தைத் தரும்.

வீடு கட்டி வாடகைக்கு விடுவதை விட நிரந்த வைப்பு (பிக்சட் டெபாசிட்) கூடுதல் வருமானம் தரும்.

உங்களால் ஒரு புத்தகத்தை எழுத முடியுமானால் புத்தங்கள் எழுதிப் பதிப்பித்து வெளியிடுவதும் இரண்டாவது வருமானத்தைத் தரும்.

வியாபார முதலீடுகள், பரஸ்பர நிதி முதலீடுகள், பங்குச் சந்தை முதலீடுகள் போன்றவையும் முதல் பெருக்கத்தின் மூலமாகவும் ஈவுத்தொகையின் மூலமாகவும் இரண்டாவது வருமானத்தைப் பெற்றுத் தரும்.

உங்களால் சுவாரசியமான காணொளிகளை உருவாக்க முடியுமானால் யூடியூப், இன்ஸ்டாகிராம் மற்றும் இன்னபிற சமூக ஊடகங்கள் மூலமாகக் கூடுதல் வருமானத்தைப் பெற முடியும்.

உங்களிடம் ஒரு துறை குறித்த அபரிமிதமான அறிவு இருக்குமானால் அது குறித்த ஆலோசனைகள் வழங்குவதன் மூலமாகவும் இரண்டாவது வருமானத்தைப் பெற முடியும்.

தற்காலத்தில் இணைய வழியில் பொருட்களை வாங்கி நேரடியாக விற்பதன் மூலமாகக் குறிப்பிட்ட தரகுத் தொகையை வருமானமாக ஈட்ட முடியும். நிலம் வாங்கிக் கொடுத்தல், வீடு வாங்கிக் கொடுத்தல், வாடகைக்கு வீடு பார்த்துத் தருதல், வாழ்க்கைத் துணையை அமைத்துக் கொடுத்தல் போன்ற தரகு வருமானம் தரும் தொழில்களைச் செய்வதன் மூலமாகவும் மற்றொரு வருமானத்தைப் பெற முடியும்.

இரண்டாவது வருமானம் என்ற ஒன்று இருந்து விட்டால் பொருளாதார ரீதியாகச் சிரமங்கள் தெரியாது. முதன்மையான வருமானம் பாதிக்கப்பட்டாலும் இரண்டாவது வருமானத்தின் மூலம் சமாளித்து விட முடியும் என்ற நம்பிக்கை பிறக்கும்.

நீங்கள் முப்பது வயதை நெருங்குகிறீர்கள் என்றால் உங்கள் முதன்மையான வருமானத்தைப் போல 10 லிருந்து 20 சதவீத வருமானம் தரும் வகையில் ஒரு இரண்டாவது வருமானத்தை உருவாக்கிக் கொள்ள வேண்டும்.

நாற்பது வயதை நெருங்குகிறீர்கள் என்றால் 20லிருந்து 30  சதவீத வருமானம் தரும் வகையில் இரண்டாவது வருமானத்தை வளர்த்து மேம்படுத்திக் கொள்ள வேண்டும்.

ஐம்பது வயதை நெருங்குகிறீர்கள் என்றால் 30லிருந்து 40 சதவீத வருமானம் தரும் வகையில் இரண்டாவது வருமானத்தை மேலும் வளர்த்தெடுத்து மேம்படுத்திக் கொண்டிருக்க வேண்டும்.

அறுபது வயதுக்கு மேல் 50 சதவீத வருமானம் தரும் வகையில் இரண்டாவது வருமானம் கிடைத்தால் நீங்கள் முதன்மையான வருமானத்தைப் பற்றிக் கவலைப்பட வேண்டியதில்லை. அறுபது வயதுக்கு மேல் நீங்கள் முதன்மையான வருமானத்தைத் தரும் வேலையிலிருந்து ஓய்வு பெற வேண்டியிருக்கும் என்பதால் இரண்டாவது வருமானம் தரும் பணியை முழுமையாகக் கையிலெடுத்துக் கொண்டு பொருளாதார நெருக்கடிகளின்றி வாழலாம்.

இத்தகவல்கள் / விவரங்கள் உங்களுக்குப் பயனுள்ளதாக அமைந்திருக்கும் என்று நினைக்கிறேன்.

மீண்டும் ஒரு பயனுள்ள தகவலோடு / விவரங்களோடு இதே வலைப்பூவில் (www.teachervijayaraman.blogspot.com) சந்திப்போம்.

நன்றி!

வணக்கம்!

*****

புத்தக வாசிப்பிற்கான யூடியூப் சேனல்கள்

புத்தக வாசிப்பிற்கான யூடியூப் சேனல்கள்

புத்தகங்கள் மற்றும் வாசிப்பு குறித்து அறிந்து யூடியூப்பைப் பயனுள்ள முறையில் பயன்படுத்த வேண்டும் நினைப்பவர்களுக்கு கீழே உள்ள யூடியூப் சேனல்கள் உதவும். இவற்றில் உலவி வாசிக்கும் ஆர்வத்தை அதிகரித்துக் கொள்ளலாம். வாசிக்க வேண்டிய சிறந்த புத்தகங்கள் குறித்த அறிமுகங்களையும் அறிந்து கொள்ளலாம். வாசிப்பு ஆர்வலர்களுக்கு இத்தளங்கள் பயனுள்ள முறையும் அமையும்.

ஒயிட் நைட்ஸ் தளம்

https://www.youtube.com/@WhiteNightstamilbookreview

புத்தக அறிமுக தளம்

https://www.youtube.com/@puthagaarimugam3425

தேசாந்திரி பதிப்பக தளம்

https://www.youtube.com/@desanthiripathippagam

தேநீர் இடைவேளை தளம்

https://www.youtube.com/@theneeridaivelai

நாவல் ரிவியூவ் தளம்

https://www.youtube.com/@Novelreview

சுபாஸ் லைப்ரரி தளம்

https://www.youtube.com/@-subhaslibrary2895

லிட்டரேச்சர் பாக்ஸ் தளம்

https://www.youtube.com/@literaturebox8980

இத்தகவல்கள் / விவரங்கள் உங்களுக்குப் பயனுள்ளதாக அமைந்திருக்கும் என்று நினைக்கிறேன்.

மீண்டும் ஒரு பயனுள்ள தகவலோடு / விவரங்களோடு இதே வலைப்பூவில் (www.teachervijayaraman.blogspot.com) சந்திப்போம்.

நன்றி!

வணக்கம்!

*****

கோடிகள் இருந்தால் கோடீஸ்வரராக முடியுமா?

கோடிகள் இருந்தால் கோடீஸ்வரராக முடியுமா?

பெரும் பணக்காரர்களாக இருந்து கடன்காரர்களாகவும் ஓட்டாண்டிகளாகவும் போனவர்கள் நிறைய பேர். உலகளவில் இதற்கு ஒரு பெரிய பட்டியலே இருக்கிறது.

மைக்கேல் ஜாக்சன். இவர் பாப் பாடகராக இருந்தவர்.

டெரல் ஓவன்ஸ். இவர் அமெரிக்க கால் பந்து வீரர்.

யுலிஸஸ் கிரான்ட். இவர் அமெரிக்க குடியரசுத் தலைவராக இருந்தவர்.

மைக் டைசன். இவர் குத்துச் சண்டை வீரராக இருந்தவர்.

இவர்கள் எல்லாம் நினைத்துப் பார்க்க முடியாத அளவுக்குச் சம்பாதித்தார்கள். அதே போல யாரும் நினைத்துப் பார்க்க முடியாத அளவுக்குக் கடன்காரர்களாகவும் ஆனார்கள்.

அமெரிக்காவில் ESPN என்கிற தொலைக்காட்சி Broke என்ற நிகழ்ச்சி மூலமாக இப்படிப்பட்டவர்களைக் காட்சிபடுத்துகிறது.

தமிழ்நாட்டிலும் இப்படி சிலர் இருந்திருக்கிறார்கள்.

தியாகராஜ பாகதவர்

சந்திரபாபு

சாவித்ரி

குரோர்பதி நிகழ்வில் ஐந்து கோடி பணத்தை வென்ற ஒரு பால்காரர் சில வருடங்களில் பணத்தையெல்லாம் இழந்து மீண்டும் பால்காரராக நேர்ந்த கதையும் நடந்திருக்கிறது.

பணமிருந்தால் மட்டும் பணக்காரர்களாக வாழ்ந்து விட முடியாது. பணத்தை சரியாக நிர்வகிக்கும் திறன் வேண்டியிருக்கிறது. செலவிற்கு ஓர் அளவு இருக்கிறது. ஆடம்பரத்திற்கு ஓர் எல்லை இருக்கிறது. ஆற்றில் போட்டாலும் அளந்து போட வேண்டியிருக்கிறது. குந்தித் தின்றாலும் குன்றும் மாளுகிறது.

“ஆகாறு அளவிட்டிது ஆயினும் கேடில்லை

போகாறு அகலாக் கடை.”                         (குறள், 478)

என்ற குறளையும் கூடவே அடுத்த குறளாக இருக்கும்

“அளவறிந்து வாழாதான் வாழ்க்கை உளபோல

இல்லாகித் தோன்றாக் கெடும்.”               (குறள், 479)

என்ற குறளையும் அடிக்கடி நினைவுபடுத்திக் கொள்ள வேண்டியிருக்கிறது.

இத்தகவல்கள் உங்களுக்குப் பயனுள்ளதாக அமைந்திருக்கும் என்று நினைக்கிறேன்.

மீண்டும் ஒரு பயனுள்ள தகவலோடு இதே வலைப்பூவில் (www.teachervijayaraman.blogspot.com) சந்திப்போம்.

நன்றி!

வணக்கம்!

*****

தங்கத்தை வாங்க 12 காரணங்கள்

தங்கத்தை வாங்க 12 காரணங்கள்

ஏன் தங்கத்தை வாங்க வேண்டும் என்பதற்கு மாமாங்க காரணங்கள் இருக்கின்றன. அதாவது பனிரெண்டு காரணங்கள் இருக்கின்றன.

1)      உலகளவிலான நிதி நெருக்கடி நிலை, பொருளாதார மந்த நிலை என எந்த நிலை வந்தாலும் தங்கத்தின் மதிப்பு ஏறும்.

2)      தங்கத்தைப் பணமாக்குவது எளிது. பணத்தைத் தங்கமாக்குவதும் எளிது.

3)      வாங்குவதும் விற்பதும் எளிது மற்றும் எப்போதும் சாத்தியம்.

4)      தங்கத்தில் முதலீடு செய்வதற்கு பெரிய முதலீட்டு அறிவோ, மூளையைக் கசக்கிக் கொள்ளும் ஆய்வுகளோ தேவையில்லை.

5)      தங்கம் ஒரு நல்ல சொத்து. இடத்தை அடைத்துக் கொள்ளாது. போகும் இடமெல்லாம் எடுத்துக் கொண்டு போக எளிதானது. உங்கள் சொத்தாகக் கருதும் வீட்டை இப்படி நீங்கள் பெயர்த்து எடுத்துக் கொண்டெல்லாம் போக முடியாது.

6)      எல்லா சொத்துகளைப் போலவும் தங்கமும் ஆண்டுகள் ஆக ஆக விலை ஏறும்.

7)      சரிவிகிதத்தில் ஒரு முதலீட்டுக் கலவையை உருவாக்கும் போது தங்க முதலீடு அதில் முதன்மையான இடத்தை வகிக்கக் கூடியது.

8)      பங்குகள் சரியாக விலையேறாமல் போகலாம். தங்கம் அப்படிப்பட்டது இல்லை. தங்கம் விலையேறாமல் ஏமாற்றி விடாது.

9)      பங்குச் சந்தை சரியாகச் செயல்படாத போது தங்கத்தின் விலை அசுரத்தனமாக ஏறும்.

10)  தங்கத்தைப் போன்ற மதிப்புமிக்க, அன்றாட வணிகப் பயன்பாட்டில் உள்ள அன்பளிப்பு வேறு ஏதும் இருக்கிறதா என்ன? மற்றும் பணத்திற்கான சுலபமான பண்டமாற்றுப் பொருள் தங்கம். தங்க நகை அடகுக் கடைகளை நீங்கள் குக்கிராமங்களிலும் பார்க்க முடியும்.

11)  அவரச காலங்களிலும் அவசர கால நிதியை உருவாக்கிக் கொள்ள தங்கம் துணை நிற்கும்.

12)  பணவீக்கத்தோடு போட்டிப் போட்டுக் கொண்டு ஓடக் கூடிய திராணி தங்கத்திற்கு இருக்கிறது.

ஆகவே நீங்கள் தங்கத்தைத் தாரளமாக வாங்கலாம். தங்கத்தின் இருப்பை அடிப்படையாக வைத்தே பணம் அச்சடிக்கப்படுகிறது என்பதால் பணத்திற்கான அடிப்படையான தங்கத்தை வாங்க இதைத் தவிர வேறு இன்னும் ஏதேனும் விஷேசக் காரணம்தான் தேவையா என்ன?

இத்தகவல்கள் உங்களுக்குப் பயனுள்ளதாக அமைந்திருக்கும் என்று நினைக்கிறேன்.

மீண்டும் ஒரு பயனுள்ள தகவலோடு இதே வலைப்பூவில் (www.teachervijayaraman.blogspot.com) சந்திப்போம்.

நன்றி!

வணக்கம்!

*****

எட்டாம் வகுப்பு – கணக்கு – விகிதமுறு எண்கள் பாடப்பகுதிக்கான பாடக்குறிப்பு

எட்டாம் வகுப்பு – கணக்கு – விகிதமுறு எண்கள் பாடப்பகுதிக்கான பாடக்குறிப்பு

எட்டாம் வகுப்பு – தமிழ் - தமிழ் வரிவடிவ வளர்ச்சி பாடத்திற்கான பாடக்குறிப்பு

எட்டாம் வகுப்பு – தமிழ் - தமிழ் வரிவடிவ வளர்ச்சி பாடத்திற்கான பாடக்குறிப்பு

நகர நில அளவைப் பதிவேடு (TSLR) பற்றித் தெரிந்து கொள்வோமா?

நகர நில அளவைப் பதிவேடு (TSLR) பற்றித் தெரிந்து கொள்வோமா?

நகர நில அளவைப் பதிவேடு ‘Town Survey Land Register’ என அழைக்கப்படுகிறது. சுருக்கமாக முதல் எழுத்துகளைக் கொண்டு சுருக்கி TSLR எனக் குறிப்பிடப்படுகிறது. நகரப்பகுதிகளில் இதுவே பட்டாவுக்குச் சமமான மதிப்பு உடைய ஆவணம் ஆகும். எனவே இதை TSLR பட்டா என்றும் சொல்லலாம். அல்லது நகரப் பட்டா என்றும் குறிப்பிட்டுக் கொள்ளலாம். வெறுமனே TSLR என்றும் சொல்லலாம்.

நகர்ப்புறங்களில் இடம் வாங்கும் போது பத்திரத்தோடு TSLR ஐயும் உன்னிப்பாகப் பார்த்து வாங்க வேண்டும். வேலிச் சண்டை, நிலத் தகராறுகள் வரும் போது TSLR அவற்றைத் தீர்க்க முக்கிய ஆவணமாகப் பயன்படும்.

ஏன் நகரங்களுக்கு மட்டும் TSLR என்றால் நகர எல்லைக்குள் இருக்கும் நிலங்களின் மதிப்பு மிக அதிகம். எனவேதான் நகர அளவை என்ற கொள்கைப்படி சர்வே செய்யப்பட்டு TSLR பராமரிக்கப்படுகிறது. கிராமங்களில் இது பட்டாவாகப் பராமரிக்கப்படுகிறது.

TSLR இல் அடங்கியுள்ள விவரங்கள் என்னவென்று பார்த்தால்,

ü ப்ளாக் எண்

ü சாலையின் பெயர்

ü சர்வே எண்

ü உட்பிரிவு எண்

ü முன்னாள் சர்வே எண்

ü நிலத்தின் வகை

ü ஏக்கர் அல்லது ஹெக்டர் மதிப்பு

ü வரி வகை

ü அடங்கலில் உள்ள பெயர்

ü காலி மனை அல்லது குடியிருப்பு குறித்த விவரம்

போன்ற விவரங்கள் TSLR இல் இருக்கும்.

TSLR ஐ எங்குப் பார்ப்பது? எப்படிப் பெறுவது? என்றால் நீங்கள் கீழ்காணும் இணையதள முகவரியில் மாவட்டம், வட்டம், நகரம் அல்லது கிராமம், சர்வே எண், உட்பிரிவு எண், வார்டு எண், நகரம், ப்ளாக் போன்ற விவரங்களைப் பதிவிட்டால் இணையதளத்தின் மூலமாகவே அனைத்தையும் பார்த்து விட முடியும் மற்றும் பதிவிறக்கம் செய்து பெற்றுக் கொள்ள முடியும்.

அதற்கான இணையதள முகவரி

http://eservices.tn.gov.in/eservicesnew/home.html

TSLR இல் நில அளவுகள் சதுர மீட்டரில் குறிப்பிடப்பட்டிருக்கும். ஒரு சதுர மீட்டர் என்பது தோராயமாக பத்தே முக்கால் சதுர அடியைக் குறிக்கும். மேலும் நில வகை ரயத்துவாரி அல்லது இனாம் அல்லது அரசு நிலம் அல்லது ஜமீன் நிலம் போன்ற விவரங்களில் பொருத்தமான விவரம் குறிப்பிடப்பட்டிருக்கும். இதில் ரயத்துவாரி என்பது சொந்த நிலத்தைக் குறிக்கும். ரயத்துவாரி என்றால் அரசுக்கு வரி செலுத்துபவர்கள் என்று பொருள்.

இப்போது நிலத்தை வாங்கும் நீங்கள் என்னென்ன விவரங்களில் கவனம் செலுத்த வேண்டும் என்பதைப் பார்ப்போம்.

கிரயப்பத்திரம் மற்றும் TSLR பட்டா ஆகிய இரண்டும் விற்பவர் பெயரில் இருக்கிறதா என்று பாருங்கள். இல்லையென்றால் விற்பவர் அவருடைய பெயருக்கு மாற்றிக் கொண்டு வந்த பின்பு வாங்குங்கள். அல்லாது போனால் நிலத்தை வாங்கும் நீங்கள் வில்லங்கத்தில் மாட்டிக் கொள்ள நேரிடும்.

பவர் வாங்கியவர் விற்கிறார் என்றால் கிரயப்பத்திரம் பவர் கொடுத்தவரின் பெயரிலும் TSLR பட்டாவானது பவர் வாங்கியவர் பெயரிலும் இருக்கிறதா எனப் பாருங்கள். பவர் கொண்டு விற்பவரிடம் நீங்கள் இடத்தை வாங்கும் போது பவர் கொடுத்தவரின் வாழ்நாள் சான்றிதழ் கேட்பார்கள். இது எதற்காக என்றால் நீங்கள் வாங்கும் போது பவர் கொடுத்தவர் இறந்திருந்தால் பவர் வாங்கியவரின் பவர் ரத்தாகியிருக்கும்.   

மேற்படி விவரங்களை நன்கு கவனித்து நகரப் பகுதிகளில் நிலங்களை வாங்கினால் உங்களுக்கு எந்தப் பிரச்சனையும் இருக்காது. சுருக்கமாகச் சொல்வதென்றால் கிரயப் பத்திரத்தோடு TSLR பட்டாவையும் நீங்கள் கண்ணில் விளக்கெண்ணெய் விட்டுப் பார்த்துக் கொள்ள வேண்டும்.  

*****

அரசின் வீட்டுக்கடன் திட்டத்தை ஏன் பயன்படுத்த வேண்டும்?

அரசின் வீட்டுக்கடன் திட்டத்தை ஏன் பயன்படுத்த வேண்டும்?

மத்திய அரசு மற்றும் தமிழ்நாடு அரசு அளிக்கும் வீட்டுக்கடனைத் தேர்ந்தெடுப்பது அரசு ஊழியர்களுக்குப் பல லட்ச ரூபாய் வட்டியை மிச்சம் செய்து கொடுக்கும். அதைத் தாண்டியும் அரசின் வீட்டுக்கடன் திட்டத்தைப் பயன்படுத்துவதில் பல நன்மைகள் உள்ளன. அவற்றை இங்கே கீழே உள்ள அட்டவணையில் ஒப்பிட்டுக் காண்போம்.

வ. எண்	அரசு வழங்கும் வீட்டுக்கடன்	வங்கிகள் வழங்கும் வீட்டுக்கடன்
1.	வட்டி விகிதம் நிலையாக இருக்கும்.	ரிசர்வ் வங்கியின் அறிவிப்புக்கு ஏற்ப மாறிக் கொண்டு இருக்கும்.
2.	வட்டி விகிதம் மூன்றாண்டுகளுக்கு ஒரு முறை பரிசீலிக்கப்படுகிறது.	ஒவ்வொரு காலாண்டுக்கும் ரிசர்வ் வங்கியின் அறிவிப்புக்கு ஏற்ப பரிசீலிக்கப்படுகிறது.
3.	தனிவட்டி முறையில் வட்டிக் கணக்கிடப்படுகிறது.	கூட்டு வட்டி முறையில் வட்டி கணக்கிடப் படுகிறது.
4.	தவணையைச் செலுத்த எஞ்சியுள்ள அசல் தொகைக்கு மட்டுமே வட்டி கணக்கிடப்படும்.	ஒட்டுமொத்த அசல் தொகைக்கும் கணக்கிடப்படுகிறது.
5.	அசல் அதிகபட்சமாக 180 தவணைகளிலும் வட்டி அதிகபட்சமாக 60 தவணைகளிலும் பிரித்து பிடிக்கப்படும்.	அசலையும் வட்டியையும் இணைத்தே தவணைகள் பிடிக்கப்படும்.
6.	வட்டியைச் செலுத்தும் கடைசி 60 தவணைகளில் வட்டி கணக்கிடப்பட மாட்டாது.	வட்டியைச் செலுத்தும் காலத்திலும் வட்டிக்கு வட்டிக் கணக்கிடப்படும்.
7.	வட்டித்தொகை வங்கிகளை விட நாற்பது சதவீதத்திற்கும் மேலாகக் குறைவாக இருக்கும்.	வட்டித்தொகை அரசு வழங்கும் வீட்டுக்கடனை விட நாற்பது சதவீதத்திற்கு மேல் அதிகமாக இருக்கும்.
8.	உதாரணமாக பத்து லட்சத்திற்கான வட்டித்தொகை உத்தேசமாக ஆறு லட்சம் அல்லது அதற்குச் சற்றுக் கூடுதலாக இருக்கும்.	உதாரணமாக பத்து லட்சத்திற்கான வட்டித்தொகை உத்தேசமாக பதினோரு லட்சத்திற்கு மேல் இருக்கும்.
9.	மாதத்  தவணைத்தொகை வங்கித் தவணைத்தொகையை விட 70 சதவீதம் குறைவாக இருக்கும்.	மாதத் தவணைத் தொகை அரசு வீட்டுக்கடனுக்கான தவணைத் தொகையை விட 70 சதவீதத்திற்கு மேல் அதிகமாக இருக்கும்.
10.	பணிக்காலம் குறைவாக இருந்தாலும் அதிபட்ச வீட்டுக்கடனைப் பெற்று மீதமுள்ள கடனைப் பணிக்கொடையில் சரிகட்டிக் கொள்ளலாம்.	பணிக்காலம் குறைவாக உள்ளோருக்கு வீட்டுக்கடன் தொகை குறைவாக வழங்கப்பட வாய்ப்புகள் இருக்கின்றன.
11.	சம்பளத்தொகையில் நாற்பது சதவீதம் வரை தவணைத்தொகையைக் பிடித்தம் செய்து கொள்ளச் செய்யலாம்..	சம்பளத்தொகையிலிருந்து எடுத்துக் கட்ட வேண்டும். அல்லது சம்பளக் கணக்கிலிருந்து பிடித்தம் செய்து கொள்ள அனுமதி வழங்க வேண்டும்.

மேற்காணும் காரங்களால் அரசு ஊழியர்கள் வங்கி வழங்கும் வீட்டுக்கடனை விட அரசு வழங்கும் வீட்டுக்கடனைத் தேர்வு செய்வதே லாபகரமாகவும் பொருளாதார ரீதியாக உதவிகரமாகவும் இருக்கும்.

இத்தகவல்கள் உங்களுக்குப் பயனுள்ளதாக அமைந்திருக்கும் என்று நினைக்கிறேன்.

மீண்டும் ஒரு பயனுள்ள தகவலோடு இதே வலைப்பூவில் (www.teachervijayaraman.blogspot.com) சந்திப்போம்.

நன்றி!

வணக்கம்!

*****