மெய்யெழுத்துத் தொடர்பான பயிற்சிக்கு உதவும் சொற்றொடர்கள்

மெய்யெழுத்துத் தொடர்பான பயிற்சிக்கு உதவும் சொற்றொடர்கள்

க்	அக்கா தந்த சொக்காய்
ங்	அங்கம் எங்கும் தங்கம்
ச்	பச்சை நிற குச்சி
ஞ்	அஞ்சலில் வந்த மஞ்சள்
ட்	பட்டு செய்த பட்டம்
ண்	வண்டியில் வந்த பண்டம்
த்	அத்தை தந்த முத்தம்
ந்	சந்தில் கிடந்த பந்து
ப்	அப்பா தந்த ஆப்பம்
ம்	தம்பி தந்த கம்பி
ய்	அய்யா தந்த கொய்யா
ர்	ஊர் கூடி இழுத்த தேர்
ல்	இல்லத்தில் இருந்த வெல்லம்
வ்	கவ்விப் பிடித்த கொவ்வை
ழ்	வாழ்வில் ஒரு முறையேனும் கூழ் குடி
ள்	துள்ளி ஓடும் வெள்ளை குதிரை
ற்	ஆற்று மணலில் ஊற்று
ன்	அன்னை வளர்த்த தென்னை

மெய்யெழுத்துகளை அறிமுகம் செய்யவும் மெய்யெழுத்துகள் தொடர்பான சொற்கள் மற்றும் சொற்றொடர்களை அறிமுகம் செய்யவும் பின்வரும் பாடலைப் பயன்படுத்திக் கொள்ளலாம்.

அக்கம் பக்கம் பார்த்தால்

அங்கும் இங்கும் யாருமில்லை

மிச்ச சொச்சம் ஏதுமில்லாமல்

பஞ்சப்பாட்டு பாடாமல்

கட்டம் போட்ட சட்டை போட்ட

அண்ணன் கையில் அவ்வளவு பண்டம்

தத்திப் பிடிக்கப் பார்த்தால்

பந்துப் போல பறந்து

அப்பால் ஓடி தப்பிப் போனவனைத்

தும்பிப் போல பாய்ந்த தம்பியும் பிடிக்க முடியவில்லையே

நெய்யில் செய்த பண்டம் எல்லாம்

தேர்த் திருவிழாவில் பார்த்து பார்த்து வாங்கியதன்றோ

வெல்லம் போல இனிக்கும் எல்லாம்

இவ்விதம் செவ்விதாய் அண்ணன் கையில் போனது

தாழ்வில்லை இனி கூழ் குடித்து மகிழ்ந்திருக்கலாம் என்ற போது

துள்ளி ஓடி வந்தானே அள்ளிச் சென்ற அண்ணன்

ஏற்றமுடன் தந்தானே ஏமாற்றாமல் பண்டங்களை எல்லாம்

உன்னை என்னை என்று எல்லாரிடமும் குறும்பு செய்யும் அண்ணன்

*****

உயிரெழுத்துகள் தொடர்பான பயிற்சிக்கு உதவும் சொற்றொடர்கள்

உயிரெழுத்துகள் தொடர்பான பயிற்சிக்கு உதவும் சொற்றொடர்கள்

அ	அம்மா தந்த அப்பம்
ஆ	ஆட்டம் போட்ட ஆடு
இ	இலையில் இருந்த இனிப்பு
ஈ	ஈரத்தில் மொய்த்த ஈக்கள்
உ	உருட்டிப் பிடித்த உருண்டை
ஊ	ஊதி வைத்த ஊதா பலூன்
எ	எருமை மேலேறிய எறும்பு
ஏ	ஏணி மேல் ஏறு
ஐ	ஐந்து மிட்டாய் கேட்ட ஐவர்
ஒ	ஒரே ஒரு ஒட்டகம்
ஓ	ஓடத்தில் இருந்த ஓலை
ஔ	ஔவை தந்த ஔடதம்

இத்துடன் அழ. வள்ளியப்பா அவர்களின் இப்பாடலும் உயிரெழுத்துகளின் அறிமுகத்திற்கும் உயிரெழுத்தில் தொடங்கும் சொற்கள் மற்றும் சொற்றொடர்கள் அறிமுகத்திற்கும் பெரிதும் உதவும்.

அம்மா இங்கே வா வா

ஆசை முத்தம் தா தா

இலையில் சோறு போட்டு

ஈயைத் தூர ஓட்டு

உன்னைப் போன்ற நல்லார்

ஊரில் யாவர் உள்ளார்?

என்னால் உனக்குத் தொல்லை

ஏதும் இங்கே இல்லை

ஐயமின்றிச் சொல்வேன்

ஒற்றுமை என்றும் பலமாம்

ஓதும் செயலே நலமாம்

ஔவை சொன்ன மொழியாம்

அஃதே எனக்கு வழியாம்

*****