உலகெங்கும் வேலைவாய்ப்புள்ள ‘மக்கள் தொகைக் கல்வி’ குறித்து படிக்க…

உலகெங்கும் வேலைவாய்ப்புள்ள ‘மக்கள் தொகைக் கல்வி’ குறித்து படிக்க…

கிழக்கு மும்பையின் தியோனார் பகுதியில் IIPS எனப்படும் International Institute for Population Sciences என்ற கல்வி நிறுவனம் உள்ளது. மக்கள்தொகை குறித்த கல்வியை இந்நிறுவனம் சர்வதேச தரத்தில் வழங்குகிறது. 1956 இல் தொடங்கப்பட்ட இந்நிறுவனம் 1985இல் நிகர்நிலைப் பல்கலைக்கழகமானது. தற்போது மத்திய அரசின் பொது சுகாதாரம் மற்றும் குடும்பநலத் துறையின் கீழ் இக்கல்வி நிறுவனம் செயல்படுகிறது. மக்கள்தொகை குறித்த ஆய்வுகள் மற்றும் தரவுகளை உருவாக்கும் நிபுணர்களை இக்கல்வி நிறுவனம் உருவாக்கி வருகிறது. இளநிலை பட்டம் பெற்றவர்கள் மக்கள்தொகை தொடர்பான முதுநிலை மற்றும் ஆய்வு படிப்புகளுக்கு இக்கல்வி நிறுவனத்தை நாடலாம். இக்கல்வி நிறுவனத்தில் சேர்வதற்கு இக்கல்வி நிறுவனம் நடத்தும் நுழைவுத் தேர்வில் தேர்வு பெறுவதுடன் நேர்காணல் தேர்விலும் தேர்வு பெற வேண்டும். மத்திய கல்வி நிறுவனமான இந்நிறுவனம் CUET நுழைவுத் தேர்வில்லாமல் அந்நிறுவனமே நடத்தும் நுழைவுத் தேர்வைக் கொண்டிருப்பது குறிப்பிடத்தக்கது. நுழைவுத் தேர்வு ஏப்ரல் மாதத்தில் நடக்கும். நுழைவுத் தேர்வில் கணக்கு, புள்ளியியல், பொது அறிவு, ஆங்கிலம் ஆகிய பிரிவுகளில் கேள்விகள் கேட்கப்படும். நுழைவுத் தேர்வில் தேர்வு பெற்றவர்கள் மாதம் ஐந்தாயிரம் உதவித்தொகையுடன் இக்கல்வி நிறுவனத்தில் பயிலலாம். இக்கல்வி நிறுவனத்தில் பயின்றவர்களுக்குப் பிரகாசமான வேலை வாய்ப்புகள் உலகெங்கும் காத்திருக்கின்றன. இந்நிறுவனம் வழங்கும் படிப்புக ள் மற்றும் நுழைவுத் தேர்வு குறித்த விவரங்களை அறிய கீழே உள்ள இணைப்பைச் சொடுக்கவும்.

 https://www.iipsindia.ac.in/

*****

முதலீட்டிற்கு முன் நீங்கள் செய்ய வேண்டியவை!

முதலீட்டிற்கு முன் நீங்கள் செய்ய வேண்டியவை!

முறைபடுத்துபவர்கள் எனப்படும் ரெகுலேட்டர்கள் இல்லாத துறைகளில் முதலீடு செய்யாதீர்கள். அது முதலீட்டுக்கு ஆபத்தாக முடியும்.

அங்கீகாரம் பெறாத மனைகள் அல்லது நிலங்களை வாங்கும் போது அவசரம் காட்டாதீர்கள். தீர விசாரிப்பதற்கு எவ்வளவு நேரம் வேண்டுமானாலும் ஒதுக்கலாம். அதன் மூலம் தேவையில்லாத அநாவசிய நிதி சார்ந்த பிரச்சனைகளில் சிக்கிக் கொள்வதைத் தவிர்க்கலாம்.

உதாரணமாக நிதித்துறையில் இந்தியாவின் மத்திய வங்கி எனப்படும் ரிசர்வ் வங்கியானது நிதி நிறுவனங்கள் அனைத்தையும் முறைப்படுத்துபவராக இருக்கிறது. மத்திய வங்கி எனப்படும் ரிசர்வ் வங்கியின் முறைபடுத்துதல் இல்லாத நிதி நிறுவனங்களில் முதலீடு செய்யக் கூடாது. அப்படி முதலீடு செய்வதால் முதலீட்டை இழக்கும் அபாயமும் ஏற்படலாம்.

அது போல பங்கு சந்தை சார்ந்த துறைகளில் பங்கு பரிவர்த்தனை ஒழுங்காற்று ஆணையம் எனும் செபி முறைபடுத்துபவராக இருக்கிறது. செபியின் அனுமதி இல்லாத பங்குச் சார்ந்த எதிலும் முதலீடு செய்யக் கூடாது. அப்படி முதலீடு செய்வதால் முதலிழக்கும் அபாயங்களை எதிர்கொள்ள வேண்டியிருக்கும்.

பலரும் ஒரு நிதி நிறுவனத்தில் முதலீடு செய்வதற்கு முன்பாக அந்த நிதி நிறுவனம் மத்திய வங்கி எனப்படும் ரிசர்வ் வங்கியினால் அனுமதிக்கப்பட்ட நிதி நிறுவனமா என்பதை பார்க்கத் தவறுகிறார்கள். கிரிப்டோ போன்ற பரிவர்த்தனைகளில் ஈடுபடுவதற்கு முன்பாக அந்தப் பரிவர்த்தனைகள் பங்கு பரிவர்த்தனை ஒழுங்காற்று ஆணையமான செபியின் வரம்புக்குள் வருகிறதா என்பதையும் கவனிக்கத் தவறுகிறார்கள்.

நீங்கள் நிதி தொடர்பான எத்தகைய பரிவர்த்தனை அல்லது முதலீட்டைச் செய்வதாக இருந்தாலும் அரசால் கட்டுப்படுத்தப்படும் மற்றம் முறைபடுத்தப்படும் அமைப்புக்குள் அவை வருகிறதா என்பதைக் கவனிக்க வேண்டும்.

நிலம் மற்றும் வீடு வாங்குவதிலும் அரசின் ஒப்புதல் பெற்ற மனைகளா? இடங்களா? என்பதையெல்லாம் உறுதிபடுத்திக் கொண்ட பிறகே அவற்றை வாங்க வேண்டும். இதற்கென உள்ள வருவாய்த் துறை மற்றும் உள்ளாட்சித் துறையின் ஆவணங்களை நன்கு பரிசோதித்த பின்பே வாங்க வேண்டும். தேவையேற்படின் இதற்கென உள்ள அங்கீகாரம் பெற்ற ஆலோசகர்களின் உதவிகளைப் பெறவும் தயங்கக் கூடாது.

ஒரு நிறுவனத்தில் முதலீடு செய்வதற்கு முன்பாக அதன் நீண்ட கால நிதிநிலை வளர்ச்சி அதாவது டிராக் ரெக்கார்ட் எப்படி இருக்கிறது என்பதைப் பார்க்க வேண்டும். அத்துடன் ஒரு நிறுவனத்தின் போக்கு மற்றும் வெளிப்படை தன்மை போன்றவற்றையும் கருத்தில் கொள்ள வேண்டும். நிலம் அல்லது வீட்டுமனை வாங்குவதிலும் நீங்கள் இது போன்று பட்டா, சிட்டா தொடர்பான விவரங்களை நீண்ட கால அளவுக்குப் பரிசோதிக்க முடியும். ஆகவே நிதி தொடர்பான எந்த விவகாரங்களிலும் அவசரப்படாமல் ஒன்றுக்கு இரண்டு முறை யோசித்து, உரிய வல்லுநர்களின் ஆலோசனைகளைப் பெற்ற பின்பு செய்வதே பாதுகாப்பான மற்றும் சரியான வழிமுறையாகும்.

நண்பர்கள் சொல்கிறார்கள், உறவினர்கள் சொல்கிறார்கள் என்பதற்காகக் குருட்டுத்தனமாக நம்பி நிதி முதலீடுகளைச் செய்வதோ, வீட்டுமனைகளை வாங்குவதோ தீராப் பிரச்சனைகளில் கொண்டு போய் விட்டு விடக் கூடியன. எப்போதும் பணம் தொடர்பான பரிவர்த்தனைகளைச் செய்வதற்கு முன்பாகப் பல முறை யோசியுங்கள். துறை சார்ந்த நிபுணர்களைக் கலந்தாலோசியுங்கள். பிறகு நிதி தொடர்பான எந்த முடிவாக இருந்தாலும் எடுங்கள்.

இத்தகவல் உங்களுக்குப் பயனுள்ளதாக இருந்திருக்கும் என்று நம்புகிறேன். இது போன்ற பயனுள்ள தகவல்களுக்குத் தொடர்ந்து இணைந்திருங்கள்.

*****

வீட்டு உபயோக ரோபோக்கள்!

வீட்டு உபயோக ரோபோக்கள்!

லக்ஸ் ஏஐ நிறுவனம் வீட்டு உபயோகத்திற்கான ரோபோக்களை உருவாக்கி வருகிறது. க்யூ.டி. என்று பெயரிடப்பட்ட இந்த ரோபோக்கள் மூன்று வயது குழந்தையின் அளவு இருக்கிறது. தன்னிடம் உள்ள கேமராக்கள் மற்றும் மைக்ரோ போன்கள் மூலமாக தகவல்களைச் சேகரித்துக் கொண்டே இருக்கும். செயற்கை நுண்ணறிவு மூலமாக இயங்கும் இந்த ரோபோ உங்களுக்கேற்ப பல விதங்களில் உங்கள் தேவைகளில் உதவும். இந்த ரோபோக்களுக்கு அதன் செயற்கை நுண்ணறிவைப் பயன்படுத்தி நீங்கள் பயிற்சியளித்து உங்கள் தனிப்பட்ட தேவைகளுக்கு ஏற்பவும் பயன்படுத்திக் கொள்ளவும் முடியும் என்பது இதன் சிறப்பான அம்சம். டிமென்ஷியா எனும் மறதிநோய் கொண்ட நோயாளிகளுக்கும், ஆட்டிசம் போன்ற கற்றல் குறைபாடு கொண்ட மாணவர்களுக்கும் இந்த ரோபோக்களைப் பயிற்சி கொடுத்து சிறப்பாகப் பயன்படுத்தவும் முடியும். இது குறித்த மேலதிக தகவல்களை அறிந்து கொள்ள கீழே உள்ள இணைப்பைச் சொடுக்கவும்.

 https://luxai.com/

****

உடல் பருமன் குறித்து அறிய வேண்டிய அவசிய தகவல்கள்!

உடல் பருமன் குறித்து அறிய வேண்டிய அவசிய தகவல்கள்!

உடல் பருமனை அறிய பி.எம்.ஐ. குறியீடு ஒரு முக்கிய அளவீடாகக் கருதப்படுகிறது.

பி.எம்.ஐ. குறியீடானது 18.5க்கும் 24.9க்கும் இடையில் இருப்பதே சரியான உடல் எடையைக் குறிக்கும் அளவீடாகும்.

பி.எம்.ஐ. குறியீடு 30க்கு மேல் இருந்தால் அது உடல் பருமன் நிலையைக் குறிக்கும்.

பி.எம்.ஐ. குறியீடு 40க்கு மேல் இருந்தால் அது ஆபத்தான உடல் பருமன் நிலையைக் குறிப்பதாகும்.

மேலும் இடுப்புச் சுற்றளவைக் கொண்டும் உடல் பருமன் நிலையைத் தீர்மானிக்கலாம்.

ஆண்களின் இடுப்புச் சுற்றுளவு 88 சென்டி மீட்டருக்கு மேல் இருந்தால் அது உடல் பருமன் நிலையைக் குறிக்கும்.

பெண்களின் இடுப்புச் சுற்றளவு 80 சென்டி மீட்டருக்கு மேல் இருந்தால் அது உடல் பருமன் நிலையைக் குறிக்கும்.

உடல் பருமனால் சர்க்கரை நோய், உயர் ரத்த அழுத்த நோய், மாரடைப்பு, பக்கவாதம், குறட்டை, மூட்டுவலி, முதுகுவலி, தோள்வலி போன்ற நோய்கள் எளிதில் உண்டாகின்றன.

உலகம் முழுவதும் 260 கோடி மக்கள் உடல் பருமனால் அவதிப்படுகின்றனர். இந்த எண்ணிக்கையானது 12 ஆண்டுகளில் 400 கோடியாக அதிகரிக்கும் என்று கணிக்கப்பட்டள்ளது.

உடல் பருமனால் அவதிப்படுவோர் உடல் எடையைக் குறைக்க மருந்து மாத்திரைகளை நாடுகின்றனர். இத்தகைய உடல் எடை குறைப்பு மருந்துகளின் தற்போதைய சந்தை மதிப்பு 49,000 கோடியாகும். இதன் மதிப்பு இன்னும் ஆறு ஆண்டுகளில் எட்டரை லட்சம் கோடியாக அதிகரிக்கும் என்று சந்தை வல்லுநர்கள் மதிப்பிட்டுள்ளனர்.

உடல் பருமனைக் குறைப்பது மற்றும் ஆரோக்கியம் பேணுவது தொடர்பான அலைபேசி செயலிகள் அதிகம் உருவாக்கப்படுகின்றன. இது போன்ற செயலிகள் வேறெந்த நாடுகளை விடவும் இந்தியாவில் அதிகம் பதிவிறக்கம் செய்யப்படுகின்றன. இவற்றின் சந்தை மதிப்பு நான்காயிரம் கோடிக்கு மேலாகும்.

உடல் பருமனுக்காக அறுவை சிகிச்சை செய்து கொள்வோரும் தற்போது அதிகரித்துள்ளனர். 2022 ஆம் ஆண்டில் மட்டும் உடல் பருமனைக் குறைப்பதற்கான அறுவை சிகிச்சை 40,000க்கு மேல் செய்யப்பட்டுள்ளன.

உடல் பருமனால் அவதிப்படுவோர் எடை குறைப்புக்கான மாத்திரைகளையும் நாடுகின்றனர் என்பதை நாம் முன்பே பார்த்தோம் அல்லவா. அவர்கள் செமாகுளூட்டைடு என்ற சர்க்கரை நோய்க்கான மருந்தை எடுத்துக் கொள்கின்றனர். ஆனால் இந்த மருந்தை மருத்துவரின் பரிந்துரையின் பேரில் சர்க்கரை நோய்க்காக எடுத்துக் கொள்ளலாமே தவிர, உடல் பருமனைக் குறைப்பதற்கான மாத்திரையாக எடுத்துக் கொள்ளக் கூடாது. ஆனால் உடல் பருமன் உடையோர் இதை பொருட்படுத்தாமல் இந்த மாத்திரையை எடுத்துக் கொள்கின்றனர். இதனால் இந்த மாத்திரைகள் அடங்கிய ஓர் அட்டையின் மதிப்பு கள்ள சந்தையில் பதினைந்தாயிரம் ரூபாய் வரை விலை போகிறது.

உடல் பருமன் உடைய சிலர் உடல் பருமனைக் குறைக்க உணவுத் திட்டத்தைப் பெறுதல், இயற்கை வைத்தியம் செய்தல், எடை குறைப்பு ஊசிகளைப் பயன்படுத்துதல் என்று வணிக நோக்கோடு வலை விரிப்போரின் மாய வலையில் சிக்கி பல்லாயிரம் ரூபாய் முதல் பல லட்ச ரூபாய் வரை செலவு செய்கின்றனர். இதனால் பண இருப்பு குறையலாமே தவிர, உடல் பருமன் குறையாது.

உடல் பருமன் என்பது ஒரு நாளில் உருவாகக் கூடியது அன்று. உணவுப் பழக்கத்தாலும் உணவு முறைகளாலும் போதிய உடல் உழைப்பு இன்மையாலும் பல நாட்களாக உருவாகக் கூடியது. ஆகவே உடல் பருமனைக் குறைக்க முயலும் போதும் அதை ஒரு சில நாட்களில் குறைத்து விட முடியாது. உணவுப் பழக்கம் மற்றும் போதிய உடல் உழைப்பு அல்லது உடற்பயிற்சி மூலமாக நீண்ட கால அளவிலேயே சரி செய்ய முடியும். இந்த உண்மையை மறுத்து விட்டு மருந்து மாத்திரைகள் மூலமாகவோ வேறு உடனடி உபாயங்கள் மூலமாகவோ உடல் பருமனைக் குறைக்க விரும்பினால் அதற்கான பக்க விளைவுகளையும் கூடுதலாக பண விரயத்தையும் சந்திக்க நேரிடும் என்பது பயமுறுத்தல் அல்ல, சரியான எச்சரிக்கையாகும்.

இது போன்ற பயனுள்ள தகவல்களுக்குத் தொடர்ந்து இணைந்திருங்கள்.

நன்றி! வணக்கம்!

*****

ஒரு சூப்பர் ஸ்டாரின் சூப்பரான முடிவின் பின்னணி!

ஒரு சூப்பர் ஸ்டாரின் சூப்பரான முடிவின் பின்னணி!

இந்தி திரையுலகின் சூப்பர் ஸ்டார் என்றால் அது அமிதாப் பச்சன்தான்.

ஒரு கட்டத்திற்கு மேல் அவரது படங்கள் சரியாக ஓடவில்லை.

அவர் மேற்கொண்ட வியாபார முயற்சிகளும் சரியான பலனளிக்கவில்லை.

அவர் பெரும் கடன்காரராகிக் கொண்டிருந்தார்.

அந்த நேரத்தில்தான் அவருக்கு ‘கோன் பனேகா குரோர்பதி’ என்ற தொலைக்காட்சி நிகழ்ச்சியைத் தொகுத்து வழங்குவதற்கான வாய்ப்பு வந்தது.

ஒரு சூப்பர் ஸ்டார் தொலைக்காட்சி நிகழ்ச்சியில் பங்கேற்பதா என்ற கேள்வியை இப்போது அமிதாப் எதிர்கொள்ள வேண்டியிருந்தது. அவர் அந்த வாய்ப்பை ஏற்றுக் கொள்ளக் கூடாது என பலர் கருத்து தெரிவித்தனர். அவரைத் தடுத்தும் பார்த்தனர்.

ஆனால் அமிதாப் பச்சன் தொலைக்காட்சி மூலமாக நிறைய மக்களைச் சந்திக்க முடியும் என்பதில் உறுதியாக நம்பினார். அவர் ‘கோன் பனேகா குரோர்பதி’ என்ற தொலைக்காட்சி நிகழ்ச்சியைத் தொகுத்து வழங்குவதென முடிவெடுத்தார்.

அவரது முடிவு மிகச் சரியாக அமைந்தது. அமிதாப் அந்த நிகழ்ச்சி மூலமாகப் பலரைச் சென்றடைந்தார். அபாரமாகச் சம்பாதித்தார். கடனையெல்லாம் அடைத்தார். அந்தத் தொலைக்காட்சி நிகழ்ச்சிக்குப் பிறகு திரைத்துறையிலும் அட்டகாசமாக முன்னேறினார்.

அவரது கருத்துப்படி ஊடகம் எது என்பது முக்கியம் கிடையாது. பார்வையாளர்களுக்கு எது தேவையோ அதை நிறைவு செய்வதுதான் முக்கியம். அந்த ஊடகம் தொலைக்காட்சியாக இருக்கலாம், திரைப்படமாக இருக்கலாம். பார்வையாளர்களின் தேவையை நிறைவு செய்தால் எந்த ஊடகமாக இருந்தாலும் அந்த ஊடகத்தில் சூப்பர் ஸ்டாராகத் திகழ முடியும் என்பதை அமிதாப் நிரூபித்தார். திரைத்துறையில் மட்டுமல்லாது தொலைக்காட்சி நிகழ்ச்சியிலும் தான் ஒரு சூப்பர் ஸ்டார்தான் என்பதை இந்த உலகுக்குக் காட்டினார்.

ஆக ஒருவரது பதவிக் குறைவோ, தகுதிக் குறைவோ ஒரு செயலில் முக்கியமில்லை. அந்தப் பதவி அல்லது தகுதி எதிர்பார்க்கும் தேவையை நிறைவு செய்தால் அந்தப் பதவியின் உச்சத்தை அதாவது அந்தத் தகுதியின் உச்சத்தை நீங்கள் அடையலாம். இதை அமிதாப் பச்சனின் முடிவு உணர்த்துகிறது அல்லவா.

இது போன்ற பயனுள்ள செய்திகளுக்குத் தொடர்ந்து இணைந்திருங்கள். பயனுள்ள செய்திகளை மற்றவர்களுக்கும் பகிர்ந்து உதவுங்கள்.

நன்றி!

வணக்கம்!

*****

தமிழ்நாட்டில் ஏன் பஞ்சுமிட்டாயைத் தடை செய்திருக்கிறார்கள் தெரியுமா?

தமிழ்நாட்டில் ஏன் பஞ்சுமிட்டாயைத் தடை செய்திருக்கிறார்கள் தெரியுமா?

பஞ்சு மிட்டாய் சேலை கட்டி…

என்று திரைப்பாடல் வரை பிரபலமாகப் பாடப்பட்ட

குழந்தைகள் குதூகலமாக விரும்பித் தின்னும்

பஞ்சுமிட்டாயைத்

தமிழ்நாட்டில்

ஏன் தடை செய்திருக்கிறார்கள் தெரியுமா?

பஞ்சுமிட்டாயின் பிங் நிறத்திற்காக அதில் ரோடாமைன்-பி என்கிற ரசாயன நிறமூட்டியைப் பயன்படுத்துகிறார்கள். இந்த ரசாயன நிறமூட்டியானது புற்றுநோயை உருவாக்கக் கூடிய காரணிகளைக் கொண்டது. இதுதான் பிங் நிற பஞ்சு மிட்டாயைத் தடை செய்வதற்கான காரணம்.

அதென்ன ரசாயன நிறமூட்டி என்கிறீர்களா? நாம் கேசரி, ஜாங்கிரி, அல்வா போன்றவற்றிற்குக் கண்ணைப் பறிக்கும் நிறம் வேண்டும் என்பதற்காகக் கேசரி பவுடர், அல்வா பவுடர் போன்றவற்றைப் பயன்படுத்துகிறோம் அல்லவா! அவைதான் நிறமூட்டிகள். அது போன்ற ஒரு நிறமூட்டிதான் இளஞ்சிவப்பு நிற பஞ்சுமிட்டாயை உருவாக்க உதவும் ரோடாமைன்-பி என்ற ரசாயன நிறமூட்டியும். அப்படியானால் கேசரி பவுடர், அல்வா பவுடர் போன்றவற்றில் புற்றுநோயை உண்டாக்கும் காரணிகள் இல்லையா என்றால், அவற்றிலும் இருக்கிறது என்பதுதான் அதிர்ச்சிக்குரிய அறிவியல் உண்மை.

அப்படியானால் நாம் உணவுகளில் நிறமூட்டிகளையே பயன்படுத்தக் கூடாதா என்றால் இயற்கையான நிறமூட்டிகளைப் பயன்படுத்தலாம். செயற்கையான ரசாயன நிறமூட்டிகளைப் பயன்படுத்தக் கூடாது.

இயற்கையில் கரோட்டின், குளோரோபில், ரிபோப்ளேவின், சாப்ரான், குர்குமின் போன்ற இயற்கை நிறமூட்டிகள் உள்ளன. இவற்றைப் பயன்படுத்தி உணவுப் பொருட்களுக்கு நிறமூட்டலாம். ஐரோப்பிய நாடுகளில் இது போன்ற இயற்கை நிறமூட்டிகள் மட்டுமே அனுமதிக்கப்பட்டுள்ளன. கரோட்டின் நிறமியின் மூலமாகச் சிவப்பு நிறத்தை உருவாக்கலாம். குளோரோபில் மூலமாகப் பச்சை நிறத்தை உருவாக்கலாம். ரிபோபிளேவின் மூலமாக ஆரஞ்சு நிறத்தை உருவாக்கலாம். சாப்ரான் மூலமாகக் குங்குமப்பூ நிறத்தை உருவாக்கலாம். குர்குமின்  மூலமாக மஞ்சள் நிறத்தை உருவாக்கலாம்.

மெக்டொனால்ட், கொகோ கோலா போன்ற பன்னாட்டு நிறுவனங்கள் இங்கிலாந்து போன்ற ஐரோப்பிய நாடுகளில் அங்குள்ள கட்டுபாடுகள் காரணமாக இயற்கையான நிறமூட்டிகளையே நிறமூட்டப் பயன்படுத்துகின்றன. ஆனால் இந்தியா போன்ற நாடுகளில் ரசாயன நிறமூட்டிகளைப் பயன்படுத்துகின்றன என்பதில் எவ்வளவு முரண்பாடு இருக்கிறது பாருங்கள்.

ஆகவே கடைகளில் விற்கப்படும் ரசாயன நிறமூட்டிகளைக் கொண்டு நிறமூட்டப்பட்ட உணவு பதார்த்தங்களை இயன்ற வரை தவிர்க்கப் பாருங்கள் என்பதை விட முற்றிலுமாகத் தவிர்க்கப் பாருங்கள் என்பதே சரியானது.

வீடுகளில் உணவுப் பொருட்களைத் தயாரிக்கும் போது ரசாயன நிறமூட்டிகளைத் தவிர்த்து இயற்கை நிறமூட்டிகள் மூலமாக நிறமூட்ட வாய்ப்பிருக்கிறதா என்று பாருங்கள். இல்லையென்றால் நிறமூட்டாமலே அந்த உணவுப் பொருட்களைத் தயாரிக்கலாமே. கேசரி சிவப்பாக இல்லையென்பதற்காக அதன் சுவை குறைந்து விடப் போகிறதா என்ன?  ஜாங்கிரியும் சிவப்பாக இல்லையென்றாலும் இனிப்பாகத்தானே இருக்கப் போகிறது?

*****

சூரியன் வருவது யாராலே?

சூரியன் வருவது யாராலே?

நாமக்கல் கவிஞரின் இந்தப் பாடலின் சில தேர்ந்தெடுக்கப்பட சில வரிகள் நான் முதல் வகுப்பு படித்த போது பாடநூலில் இருந்தது. இப்போது படிக்கும் போதும் சரி, நினைவில் இருப்பதிலிருந்து பாடிப் பார்க்கும் போதும் சரி ஒரு பரவசம் வருகிறது. இவ்வளவு பெரிய கருப்பொருளை அவ்வளவு சிறிய வயதில் மாணவர்களுக்கான பாடமாக வைக்கலாமா என்று அப்போதே இந்தப் பாடலைப் பற்றிய விமர்சனங்கள் உண்டு. இந்தப் பாடலை ஆசிரியர் பாட, நாங்கள் பின்தொடர்ந்து பாட அந்தக் காலத்தில் மகிழ்ச்சியாகவே இருந்தது. இப்போதும் இந்தப் பாடலுக்கான தேவையும் அவசியமும் இருப்பதாகவே உணர்கிறேன். நீங்கள் எப்படி உணர்கிறீர்கள்? படித்துப் பார்த்து விட்டு உங்கள் கருத்துகளைப் பகிருங்களேன். பலரும் பயன் பெற பாடலையும் பகிருங்களேன்.

சூரியன் வருவது யாராலே?

சந்திரன் திரிவதும் எவராலே?

காரிருள் வானில் மின்மினிபோல்

கண்ணிற் படுவன அவைஎன்ன?

 

பேரிடி மின்னல் எதனாலே?

பெருமழை பெய்வதும் எவராலே?

யாரிதற் கெல்லாம் அதிகாரி?

அதைநாம் எண்ணிட வேண்டாவோ?

 

தண்ணீர் விழுந்ததும் விதையின்றித்

தரையில் முளைத்திடும் புல் ஏது?

 

மண்ணில் போட்டது விதையொன்று

மரஞ்செடி யாவது யாராலே?

 

கண்ணில்தெரியாச் சிசுவை எல்லாம்

கருவில் வள்ர்பதுயார் வேலை?

எண்ணிப் பார்த்தால் இதற்கெல்லாம்

ஏதோ ஒருவிசை இருக்குமன்றோ?

 

எத்தனை மிருகம்! எத்தனை மீன்!

எத்தனை ஊர்வன பறப்பனபார்!

எத்தனை பூச்சிகள் புழுவகைகள்!

எண்ணத் தொலையாச் செடிகொடிகள்!

 

எத்தனை நிறங்கள் உருவங்கள்!

எல்லா வற்றையும் எண்ணுங்கால்

அத்தனை யும்தர ஒருகர்த்தன்

யாரோ எங்கோ இருப்பதுமெய்.

 

அல்லா வென்பார் சிலபேர்கள்;

அரன் அரியென்பார் சிலபேர்கள்;

வல்லான் அவன்பர மண்டலத்தில்

வாழும் தந்தையென்பார்கள்;

 

சொல்லால் விளங்கா ‘நிர்வாணம்’

என்றும் சிலபேர் சொல்வார்கள்;

எல்லா மிப்படிப் பலபேசும்

ஏதொ ஒருபொருள் இருக்கிறதே!

 

அந்தப் பொருளை நாம்நினைத்தே

அனைவரும் அன்பாய்க் குலவிடுவோம்,

எந்தப் படியாய் எவர் அதனை

எப்படித் தொழுதால் நமக்கென்ன?

 

நிந்தை பிறரைப் பேசாமல்

நினைவிலும் கெடுதல் செய்யாமல்

வந்திப்போம் அதை வணங்கிடுவோம்;

வாழ்வோம் சுகமாய் வாழ்ந்திடுவோம்.

*****

ஓவியர் ஆழி வே. இராமசாமியின் ‘மறு கன்னம்’ – ஓர் எளிய நூல் அறிமுகம்!

ஓவியர் ஆழி வே. இராமசாமியின் ‘மறு கன்னம்’ – ஓர் எளிய நூல் அறிமுகம்!

ஓவியர் ஆழி வே. இராமசாமி ஓர் ஓவியர், ஆசிரியர், எழுத்தாளர், மனித நேயமிக்க பண்பாளர். தனது ஓவிய நூல்கள் மூலமாகத் தமிழகத்தில் பல ஓவியர்களை உருவாக்கிய ஓவிய ஆளுமை. அறிவியல், ஆன்மிகம், பொது அறிவு, சிறார் இலக்கியம் என்று பரந்து பட்ட தளங்களில் எழுதிய மிகச் சிறந்த எழுத்து ஆகிருதியும் கூட.

அவரது ‘மறு கன்னம்’ என்ற நூல் சிறுவர்களுக்கான கதைகள் அடங்கிய தொகுப்பு. ஆழியின் மறைவுக்குப் பின் அவரது மகன் ஆழி சத்யன் இத்தொகுப்பைக் கொண்டு வந்துள்ளார். இத்தொகுப்பில் ஆழியின் ஓவிய ஆளுமை, எழுத்து ஆளுமை ஆகிய இரண்டையும் காண முடிகிறது. அவர் எழுதிய கதைகளுக்கு அவரே ஓவியங்களையும் தீட்டியுள்ளார். இக்கதைகள் அனைத்தும் 1960லிருந்து பல்வேறு சிறார் இதழ்களில் வெளிவந்தவை. இத்தொகுப்பில் இடம் பெற்றிருக்கும் ‘நேர்மை’ என்ற சிறுகதையை ஒன்பதாம் வகுப்பு தமிழ் பாடநூலில் நீங்கள் படித்திருக்கலாம். தமிழகத்தைத் தாண்டி ‘உல்லாச பயணம்’ என்ற சிறார் கதை கர்நாடக அரசின் தமிழ் பாட நூலில் இடம் பெற்றுள்ளது. ஆழியின் கதைச் சிறப்புக்கு இவையெல்லாம் சான்றுகள்.

இத்தொகுப்பில்,

1. ஏழைப்பெண்,

2. அப்படியும் இப்படியும்,

3. குடுமி சார்,

4. நேர்மை.

5. காணாமல் போனவன்,

6. அவர்கள் நண்பர்கள்,

7. உல்லாசப் பயணம்,

8. பிச்சுவும் பிள்ளையாரும்,

9. இது கூடத் தெரியாதா?

10. பாட்டியின் தகரப் பெட்டி,

11. அதுதான் ரகசியம்

ஆகிய பதினோரு கதைகள் இடம் பெற்றுள்ளன.  இப்பதினோரு கதைகளும் நல்லுணர்வை மையமாகக் கொண்டவை. வாழ்க்கையில் நம்பிக்கையையும் நேர்மையையும் மனிதாபிமானத்தையும் வளர்ப்பவை.

ஆழியின் கதைகளின் சாராம்சம் மெல்லுணர்வு. கதைகளில் எதிர்மறைப் பாத்திரங்கள் குறைவு. ‘அப்படியும் இப்படியும்’ என்ற கதையில் வரும் சின்னம்மா மீனாட்சியைத் தவிர மற்ற அனைவரும் மனம் திருந்தக் கூடிய நற்பாத்திரங்களே. பெரும்பாலான கதைகள் வறுமை நிலையையும், வறுமை நிலையினால் உண்டாகும் தாழ்வு உணர்வையும் சித்தரித்து அதற்குத் தீர்வு தேடக் கூடிய கதைகள். ஏழ்மை நிலையில் இருப்பவர்களைத் தாழ்வாகப் பார்க்கவோ, திருடர்களாக கருதவோ தேவையில்லை என்ற பக்கம் நின்று வாதிடக் கூடியவை. 1960க்கும் 1980க்கும் இடைபட்ட கால சூழலில் பள்ளிச் சிறார்களின் மனமானது கல்வி சார்ந்தும், பொருளாதாரம் சார்ந்தும், பழக்க வழக்கங்கள் சார்ந்தும் எப்படியெல்லாம் இயங்கியிருக்கின்றன என்பதை நுட்பமாகப் பதிவு செய்திருப்பவை.

ஆசைகளை நிறைவேற்றிக் கொள்ள முடியாத நிலையில் சஞ்சலப்படும் மனதை ஆற்றுப்படுத்துவதும், கிராமியப் பின்னணியில் பயிலும் மாணவர்களின் தாழ்வுணர்வைக் களைதலும், எளிமையை இகழாமல் ஏற்றுக் கொள்ளச் செய்வதும், சிறு சிறு மனப் பிணக்குகளைப் பொறுமையாக அலசிப் பார்த்துத் தீர்த்துக் கொள்ளுதலும் என்று ஆழியின் கதைகள் அனைத்தும் உளவியல் சார்ந்த மனமாற்றத்தை ஏற்படுத்தும் நோக்கத்தை மையமாகக் கொண்டு படைக்கப்பட்டவையாக இருக்கின்றன. இந்த நோக்கத்திற்காக அவர் தேர்ந்தெடுத்துக் கொள்ளும் களமும், பாத்திரங்களும், சூழலும் அவற்றைச் சித்தரிப்பதற்காக அவர் தேர்ந்து கொள்ளும் எழுத்தும் கன கச்சிதமானவை. எந்த இடத்திலும் கூடுதலாக ஒரு வார்த்தையோ, தேவையில்லாத சூழல் சித்தரிப்பையோ இக்கதைகளில் கண்டு விட முடியாது. அந்த வகையில் சிறுவர்களுக்கான நேர்த்தியான கதைகள் அடங்கிய தொகுப்பு எனலாம் இத்தொகுப்பை.

மனித குணத்தின் ஒரு சில அடிப்படைகள் எக்காலத்திலும் மாறாமல் அப்படியேதான் இருக்கின்றன என்பதைக் கருத்தில் கொண்டு பார்க்கும் போது இக்கதைகளைக் காலத்தால் பிந்தியவை என்று குறைத்தும் மதிப்பிட்டு விட முடியாது. கதைகள் பேசும் பொருள் எக்காலத்திற்கும் பொருந்தக் கூடியவையாகவே இருக்கின்றன.

நூலின் அமைப்பும் நூலுக்காகத் தேர்ந்து கொண்ட கதைகளும் நூலின் தரத்தை உயர்த்துகின்றன. அதே நேரத்தில் நூலில் அடங்கியுள்ள கதைகளுக்கு பொருளடக்கம் இல்லாதது, எந்தக் கதை எப்போது எந்த இதழில் இடம் பெற்றது என்ற தகவல் இல்லாதது ஆகியன போதாமை உணர்வை உண்டாக்குகின்றன.

ஓவியத்திற்காகவும் சிறுவர் இலக்கியத்திற்காகவும் ஏராளமான நூல்கள் எழுதியுள்ள ஆழியின் நூல்களை அவரது மைந்தன் பதிப்பிக்கத் தொடங்கியிருப்பது ஓவிய உலகுக்கும், சிறுவர் இலக்கிய உலகுக்கும் கிடைத்த கொடுப்பினை என்றுதான் சொல்ல வேண்டும்.

தொடர்ந்து ஆழியின் நூல்களைப் பதிப்பிப்பதில் முனைப்பு காட்டி வரும் ஆழியின் குடும்பத்தினருக்கும், கீழ்வேளூரில் இயங்கி வரும் மகிழம் இலக்கிய களத்திற்கும் இலக்கிய உலகம் என்றும் கடமைப்பட்டிருக்கிறது.

நூல் குறித்த விவரங்கள் :

நூலின் பெயர் : மறு கன்னம்.

நூலாசிரியர் : ஆழி வே. இராமசாமி.

தொகுப்பாசிரியர் : ஆழி சத்தியன்,

நூலின் விலை : 120 ரூபாய்.

நூலைப் பெற அணுக வேண்டிய முகவரி : சித்ரகலா பதிப்பகம், அகரக்கடம்பனூர், கீழ்வேளூர் – 611104, நாகப்பட்டினம் மாவட்டம்.

தொடர்பு எண் : 94433 82614.

இது போன்ற பயனுள்ள நூலறிமுகங்களுக்குத் தொடர்ந்து இணைந்திருங்கள். நன்றி! வணக்கம்!

*****

தங்க பத்திரத்தில் முதலீடு செய்யுங்கள்!

தங்க பத்திரத்தில் முதலீடு செய்யுங்கள்!

தங்கப் பத்திரத்தின் மூலம் முதலீடு செய்யும் முறையை மத்திய அரசு ரிசர்வ் வங்கியின் மூலம் வழங்கி வருகிறது.

அதன்படி 2023-24ஆம் ஆண்டுக்கான 4ஆவது சீரிஸ் தங்கப் பத்திரங்கள் பிப்ரவரி 12 முதல் 16 வரை விற்பனை செய்யப்படுகின்றன.

8 ஆண்டுகள் கழித்து அன்றைய தங்கத்தின் விலைக்கு ரிசர்வ் வங்கியே இந்த பத்திரங்களை பெற்றுக் கொள்ளும். அதுவரை ஆண்டுக்கு 2.5% வட்டியும் கிடைக்கும். கூடுதல் விவரங்களுக்குக் கீழே உள்ள இணைப்பைச் சொடுக்கவும்.

 https://www.pib.gov.in/PressReleseDetail.aspx?PRID=2004718

*****

நீட் நுழைவுத்தேர்வுக்கு இன்று முதல் விண்ணப்பிக்கலாம்!

நீட் நுழைவுத்தேர்வுக்கு இன்று முதல் விண்ணப்பிக்கலாம்!

எம்.பி.பி.எஸ். மருத்துவ படிப்பிற்கான நுழைவுத் தேர்வான நீட் தேர்விற்கு இன்று முதல் இணைய வழியில் விண்ணப்பிக்கலாம். இன்றிலிருந்து மார்ச் 9ஆம் தேதி இரவு 9 மணி வரை விண்ணப்பிக்கலாம். மே 5ஆம் தேதி நீட் தேர்வு நடைபெறும்.

இணைய வழியில் விண்ணப்பிப்பதற்குக் கீழே உள்ள இணைப்பைச் சொடுக்கவும்.

 https://www.nta.ac.in/

அல்லது

https://exams.nta.ac.in/

*****

உங்கள் அறைகளை அழகியலோடு வடிவமைக்க…

உங்கள் அறைகளை அழகியலோடு வடிவமைக்க…

உங்கள் அறைகளை அழகியலோடு வடிவமைக்க, உங்கள் அறையைப் படமெடுத்து இந்தத் தளத்தில் கொடுத்தால் போதும் மிக அழகாக இந்தத்  தளம் உங்கள் அறையை வடிவமைத்துக் காட்டும். அத்துடன் ஐம்பது ஆண்டுகளுக்கு முன்பான ரசனையோடு வேண்டும், நூறு ஆண்டுகளுக்கு முன்பான ரசனையோடு வேண்டும் என்று கேட்டாலும் அதற்கேற்ப அந்தக் காலத்து வடிவமைப்பில் வடிவமைத்துத் தரும். இதன் வலைதளத்திற்குள் செல்ல உங்கள் மின்னஞ்சல் மூலமாக இந்தத் தளத்தைத் தொடர்பு கொண்டு தளத்தில் நுழைவதற்கான இசைவைச் செய்து கொள்ள வேண்டும். இல்லையென்றால் இந்தத் தளத்திற்குச் செல்லும் போதே Sorry, You have been blocked என்று காட்டும். இதன் வலைதளத்திற்குச் செல்ல கீழே உள்ள இணைப்பைச் சொடுக்கவும்.

 https://www.wayfairnext.com/decorify

*****

சில டிரான்ஸ்கிரைபர் தளங்கள்!

சில டிரான்ஸ்கிரைபர் தளங்கள்!

இணையச் சந்திப்புகள், கலந்துரையாடல்கள், கருத்தரங்கங்கள் ஆகியவற்றில் பேசப்பட்ட கருத்துகளை எழுத்து வடிவில் யாராவது தொகுத்துத் தந்தால் எவ்வளவு நன்றாக இருக்கும் என்று நினைக்கிறீர்களா? அப்படி மாற்றித் தருவதற்கான தளங்கள் இணையத்தில் இருக்கின்றன. அப்படி மாற்றித் தரும் தளங்களில் ஒன்று OTTER.AI என்கிற தளமாகும். அதே போல வீடியோக்களில் இடம் பெறும் வசனங்களை எழுத்து வடிவில் மாற்றித் தந்தால் எப்படி இருக்கும்? அமேசானிலும் இப்படி ஒரு தளம் இருக்கிறது. இப்படி செய்து தருவதை Transcibe என்கிறார்கள். இதை செய்து தரும் தளங்களை Transcribers என்று சொல்கிறார்கள். Otter.ai இன் டிரான்ஸ்கிரைபர் தளத்திற்குச் செல்ல கீழே உள்ள இணைப்பைச் சொடுக்குங்கள்.

 https://otter.ai/

அமேசானின் டிரான்ஸ்கிரைபர் தளத்திற்குச் செல்ல கீழே உள்ள இணைப்பைச் சொடுக்குங்கள்.

 https://aws.amazon.com/pm/transcribe/

*****

இணைய வழியில் நீங்களே நேரடியாகத் தொழில் வரி செலுத்துவது எப்படி?

இணைய வழியில் நீங்களே நேரடியாகத் தொழில் வரி செலுத்துவது எப்படி?

இணைய வழியில் நீங்களே நேரடியாகத் தொழில் வரியைச் செலுத்தி அதற்கான ரசீதினைப் பதிவிறக்கம் செய்து கொள்ளலாம். அதற்கான வழிமுறைகளைத் தற்போது காண்போம்.

1.  Open Chrome browser

2. Type search box - vp tax

3. Click - Rural development and panchayat raj

4. Click - விரைவாக வரி செலுத்த

அல்லது கீழே உள்ள இணைப்பைச் சொடுக்கவும்

 https://vptax.tnrd.tn.gov.in/project/forms/VillagePanchayatMaster/quick_pay.php

5. Click - pay tax

6. Type-  Name in english

Mobile number

E-mail I'd

Select - district, union

Panchayat

Type - வரிவிதிப்பு எண்

Enter - captcha

Click - search

7. Click - online & pay(Alt+shipt+p)

8. Net banking, debit card Or credit card ஆகியவற்றில் ஏதேனும் ஒன்றைப் பயன்படுத்தித் தொகையினை செலுத்தலாம்.

Download receipt ஐ click செய்து இரசீதினைப் பதிவிறக்கி கொள்ளலாம்.

இவ்வழி முறையில் தொழில் வரியைச் செலுத்தி ரசீதைப் பதிவிறக்கம் செய்து பயன் பெறுங்கள். இந்தப் பயனுள்ள தகவலை மற்றவர்களுக்குப் பகிர்ந்து உதவுங்கள். நன்றி! வணக்கம்!

*****

வருமான வரி – 2024 : சில தகவல்கள்!

வருமான வரி – 2024 : சில தகவல்கள்!

வருமான வரி செலுத்துபவர்கள் புதிய முறை, பழைய முறை ஆகிய இரண்டு முறைகளில் தங்களுக்கு சகாயமாக அமையும் முறையின்படி கட்டலாம். பெரும்பாலும் பத்து லட்சத்திற்கு மேல் ஆண்டு வருமானம் பெறுபவர்களுக்கு புதிய முறையே சகாயமாக இருக்கும்.

வருமான வரியை இரண்டு முறைகளிலும் கணக்கிட்டுப் பார்த்து எந்த முறை சகாயமாக இருக்கிறது என்பதை அறிந்து கொண்டு அந்த முறையின் படி வருமான வரியைச் செலுத்தலாம்.

பழைய வருமான வரி முறையின் வரி அமைப்பை முதலில் பார்த்து விடுவோம்.

Upto 2,50,000 - Nil Tax

2,50,001 to 5,00,000 - 5%

5,00,001 to 10,00,000 - 20%

Exceeding 10,00,000 - 30%

புதிய வருமான வரி முறையின் வரி அமைப்பை அடுத்துக் காண்போம்.

Upto 3,00,000 - Nil Tax

3,00,001 to 6,00,000 - 5%

6,00,001 to 9,00,000 - 10%

9,00,001 to 12,00,000 - 15%

12,00,001 to 15,00,000 - 20%

Exceeding 15,00,000 - 30%

 ஒருமுறை புதிய வருமான வரி (New Regime) முறைக்கு மாறி விட்டால் மீண்டும் பழைய முறைக்கு (Old Regime)  வர முடியாது என்பது தவறான தகவல் ஆகும். வருமான வரி செலுத்தும் ஒருவர் எப்பொழுது வேண்டுமானாலும் அவருக்கு வசதியான முறைக்கு மாறிக் கொள்ளலாம். ஆனால் வியாபாரம் மற்றும் பிற வழிகளில் பிற வருமானம் உள்ளவர்கள் மட்டும் தான் மீண்டும் பழைய முறைக்கு மாற முடியாது.

வருமான வரியைக் கணக்கிடும் போது பின்வருவனவற்றைக் கருத்தில் கொள்ள வேண்டும்.

 மார்ச் 2023 முதல் பிப்ரவரி 2024 வரை  பெற்ற சம்பளம்,

DA Arrears,

போனஸ்,

இதர Arrears

ஆகியவற்றின் கூட்டுத்தொகை தான் Gross Salary Income.

பழையை வருமான வரி முறையில்

HRA,

Standard Deduction 50,000,

Professional Tax,

HBA Interest,

Conveyance Allowance (Physically Handicapped only),

Hill Allowance,

Savings (Maximum GPF Employee -1,50,000, CPS Employee - 2,00,000),

NHIS - Medical Insurance - Educational Loan Interest - CMPRF

ஆகியவற்றைக் கழித்த பிறகு வருவது தான் Net Taxable Income.  இதை Nearest ten க்கு Round off செய்ய வேண்டும்.

 புதிய வருமான வரி முறையில்

Standard Deduction 50,000,

Conveyance Allowance (Physically Handicapped only)

இவை இரண்டை மட்டும் தான் கழிக்க வேண்டும். அது கழித்த பின் வருவது Net Taxable Income.

இதை Nearest ten க்கு Round off செய்ய வேண்டும்.

Net Taxable Income-க்கு தான் வருமான வரி கணக்கிடவேண்டும்.

 வருமான வரியை Nearest ten க்கு Round off செய்ய கூடாது.

 வருமான வரித் தொகைக்கு Health & Education Cess 4% கணக்கிட வேண்டும்.

பழைய வருமான வரி முறையில் வரி செலுத்தும் போது  CPS இல் உள்ளவர்கள் தாம் செலுத்தும் CPS சந்தாவை மட்டும் தான் கணக்கு காட்ட வேண்டும். அரசு செலுத்தும் 10% தொகையை கணக்கில் சேர்க்கக் கூடாது.  CPSஇல் உள்ளவர்கள் தங்களுடைய CPS சந்தா தொகையில் u/s 80 CCD(1B) இல் 50,000 ரூபாயும், u/s 80 CCD(1)இல் மீதி தொகையையும் கழிக்கலாம். HBA Interest, HBA Principal உள்ளவர்கள் HRA-வை கழிக்கக் கூடாது.

இத்தகவல்களைக் கருத்தில் கொண்டு வருமான வரி செலுத்துபவர்கள் தங்களது வருமான வரியைக் கணக்கிட்டு புதிய முறை அல்லது பழைய முறையில் தங்களுக்கு உகந்த முறையில் வரி செலுத்தலாம்.

*****