கல்வி & பொது அறிவுச் செய்திகள் – 01.09.2026

கல்வி & பொது அறிவுச் செய்திகள் – 01.09.2026

1) மேட்டூர் அணையை இன்று பாசனத்துக்காகத் தமிழக முதல்வர் ச. ஜோசப் விஜய் திறந்து வைக்கிறார்.

2) தமிழகத்தில் கடந்த ஆண்டை விட இந்த ஆண்டு நெல் சாகுபடி பரப்பு 1.22 லட்சம் ஹெக்டேர் குறைந்துள்ளது.

3) நேபாள வெள்ளத்தில் உயிரிழந்தோரின் எண்ணிக்கை 939 ஆக அதிகரித்துள்ளது.

4) இந்தியப் பொருளாதாரம் ஏப்ரல் – சூன் காலாண்டில் 7.8 சதவீதமாக வளர்ச்சி அடைந்துள்ளது.

5) அமெரிக்கா – ஈரான் இடையே மீண்டும் மோதல் தொடங்கியுள்ளது.

Education & GK News

1) Tamil Nadu Chief Minister C. Joseph Vijay is opening the Mettur Dam for irrigation today.

2) The area under paddy cultivation in Tamil Nadu has decreased by 1.22 lakh hectares compared to last year.

3) The death toll from the floods in Nepal has risen to 939.

4) The Indian economy grew by 7.8 percent in the April–June quarter.

5) Conflict has reignited between the United States and Iran.

பேய் பொம்மை

அமானுஷ்யங்களின் அட்ரஸ்

அட்ரஸ் – 70

பேய் பொம்மை

ஆவணி மாதத்து வெயிலின் வெக்கையும், மழையை எதிர்பார்த்துப் புழுங்கிக் கொண்டிருக்கும் ஏமாற்றமும் கலந்த இரவு நேரம். மின்விசிறி காற்றுக்குப் பதில் அனலை ஹால் எங்கும் பரப்பிக் கொண்டிருந்தது.

தமிழரசன் தன் மடிக்கணினியை மூட முயன்றபோது, கோவிந்த் கையில் ஒரு பழைய துணிப் பொம்மையை வைத்து உருட்டிக்கொண்டிருந்தான். அது பிளாஸ்டிக் பொம்மையல்ல; தையல்கள் பிரிந்த, செம்பட்டை தலைமுடி கொண்ட, கண்கள் மட்டும் சற்று விசித்திரமாகத் தைக்கப்பட்ட ஒரு அமானுஷ்ய தன்மை கொண்ட பேய் பொம்மை.

"என்ன இது கோவிந்த்?"  என்றான் தமிழரசன்.

"அன்னபெல், தமிழரசன். போன வாரம் மன்னார்குடி, அரிசிகடைச் சந்தில் இருக்குற பழைய பேப்பர் கடையில் அஞ்சு ரூபாய்க்கு வாங்குனேன். ஆனா, இது சும்மா பொம்மை இல்ல." கோவிந்த் குரலைத் தாழ்த்தினான். "இதுக்குள்ள ஓர் ஆவி இருக்கு!"

தமிழரசன் சலிப்புடன் கோவிந்தைப் பார்த்தான். "விஜயராமனோட சேர்ந்து இந்த ஆவி பிடிக்கிற பழக்கம் உனக்கும் வந்துட்டு. கோவிந்த், 1970கள்ல அமெரிக்காவில் எட், லோரேன் வாரன் தம்பதி பண்ணின அதே ஏமாற்று வேலை. ஆவி, பேய் எல்லாமே மனித மூளையோட ஐடியாமோட்டார் விளைவுதான். இது ஒரு வெறும் பஞ்சு அடைச்ச துணி."

"அப்படியில்லை தமிழரசன்! நேத்து நைட் இதை டேபிள் மேல வச்சுட்டுத் தூங்கினேன். காலையில பாத்தா என் கட்டிலுக்கு அடியில கிடக்கு. பக்கத்துல 'எனக்கு பசிக்குது'ன்னு தமிழ்ல ஒரு பேப்பர் குறிப்பு!" கோவிந்தின் முகத்தில் லேசான வேர்வை.

தமிழரசன் புன்னகைத்தான். "நியூட்டனின் முதல் விதிப்படி புறவிசை இல்லாமல் ஒரு பொருள் நகர முடியாது. நீ தூக்கத்துல நடக்குற ஆள் கோவிந்த். சரி, உன் திருப்திக்கு ஒரு எக்ஸ்பெரிமெண்ட் பண்ணுவோம்."

தமிழரசன் அந்தப் பொம்மையை ஹாலில் இருந்த ஒரு மர நாற்காலியில் அமர வைத்தான். அதைக் சுற்றி மெல்லிய லேசர் டிடெக்டர் அலாரத்தைப் பொருத்தினான். "இனி இந்த பொம்மை ஒரு மைக்ரோ மீட்டர் நகர்ந்தாலும் அலாரம் அடிக்கும். அறிவியல் பொய் சொல்லாது."

இரவு 1:15.

திடீரென வீட்டின் மின்சாரம் துண்டிக்கப்பட்டது. ஹாலில் இருந்து மெல்லிய அலாரம் ஒலி எழுப்பியது.

கோவிந்த் பாய்ந்து எழுந்து தமிழரசனின் தோளைப் பிடித்தான். "தமிழரசன்! அலாரம் அடிக்குது!"

இருவரும் எமர்ஜென்ஸி லைட்டுடன் ஹாலுக்கு வந்தார்கள். லேசர் அலைவரிசை துண்டிக்கப்பட்டிருந்தது. ஆனால், நாற்காலியில் பொம்மை இல்லை!

"பாத்தியா! நான் சொன்னேன்ல!" கோவிந்த் நடுங்கினான்.

தமிழரசன் எமர்ஜென்ஸி லைட்டின் வெளிச்சத்தை நாற்காலியின் கீழே அடித்தான். பொம்மை அங்கே தலைகீழாகக் கிடந்தது. தமிழரசன் அதை உற்றுப் பார்த்தான். பொம்மையின் துணி தையலில் ஒரு சிறிய இரும்பு அதிர்வுச் சில்லு மற்றும் ரிமோட் கண்ட்ரோல் ரிசீவர் ஒளித்து வைக்கப்பட்டிருந்தது!

"கோவிந்த், இது ஆவியும் இல்லை, மண்ணாங்கட்டியும் இல்லை. 5ஜி ரிமோட் சிப் வச்சு உன்னை யாரோ ஏமாத்துறாங்க." என்று தமிழரசன் சொல்லி முடிப்பதற்குள், அவர்களது மொபைல் போன்கள் இரண்டிலும் ஒரே நேரத்தில் ஒரு மெசேஜ் வந்தது.

அனுப்பியவர் அன்னபெல்.

மெசேஜைப் படித்தான் தமிழரசன். "சிப் இருப்பது உண்மைதான் தமிழரசன். ஆனால், அந்தச் சிப்பை அங்கே வைத்த ஆள் போன வாரமே ஒரு கார் விபத்தில் இறந்து விட்டான்!"

அடுத்த நொடி. வீட்டின் மின்சாரம் மீண்டும் வந்தது. நாற்காலியில் கிடந்த பொம்மை, மெதுவாகத் தன் தலையை 180 டிகிரி திருப்பி, தமிழரசனைப் பார்த்து பகபகவெனச் சிரித்தது!

தமிழரசனின் கையில் இருந்த எமர்ஜென்ஸி லைட் கீழே விழுந்து நொறுங்கியது.

-           அட்ரஸைத் தேடுவோம்!

*****

கல்வி & பொது அறிவுச் செய்திகள் – 31.08.2026

கல்வி & பொது அறிவுச் செய்திகள் – 31.08.2026

1) நேபாள பெருவெள்ளத்தில் உயிரிழந்தவர்களின் எண்ணிக்கை 788 ஆக அதிகரித்துள்ளது.

2) பிரதமர் நரேந்திர மோடிக்கு உஸ்பெகிஸ்தான் நாட்டின் உயரிய விருது வழங்கப்பட்டுள்ளது.

3) டெல்டா மாவட்டங்களின் நீர் பாசனத்துக்காக மேட்டூர் அணை நாளை திறக்கப்பட உள்ளது.

4) தமிழக அரசு கல்லூரிகளில் 6000 விரிவுரையாளர் பணியிடங்களை நிரப்புவதற்கான தேர்வு மூன்று கட்டங்களாக நடத்தப்பட உள்ளது.

5) ரஷ்யாவுக்கு அதிகம் சுத்தகரிக்கப்பட்ட பெட்ரோல் ஏற்றுமதி செய்யும் நாடாக இந்தியா உருவெடுத்துள்ளது.

Education & GK News

1) The death toll from the massive floods in Nepal has risen to 788.

2) Prime Minister Narendra Modi has been conferred with Uzbekistan's highest award.

3) The Mettur Dam is set to be opened tomorrow for irrigation in the Delta districts.

4) The recruitment examination to fill 6,000 lecturer posts in Tamil Nadu government colleges will be conducted in three phases.

5) India has emerged as a major exporter of refined petrol to Russia.

இறந்த பிறகும் ஏமாற்றாத ஒரே மனிதன்!

அமானுஷ்யத்தின் அட்ரஸ்

அட்ரஸ் – 69

இறந்த பிறகும் ஏமாற்றாத ஒரே மனிதன்

பேய்கள் இருக்கிறதா இல்லையா என்பது தொழில்நுட்பம் எவ்வளவோ வளர்ந்து விட்ட இன்று கூட விவாதத்திற்குரிய விஷயமாகத்தான் இருக்கிறது. ஆனால், இருக்கிறது என்று சொல்லி கல்லா கட்டிய கூட்டத்தை 1920களில் ஒரு மனிதர் புரட்டி எடுத்தார்.

அந்த மனிதரின் பெயர் ஹாரி ஹூடினி.

உலகப் புகழ்பெற்ற மாயாஜாலக்காரர்.

கைகளில் விலங்கு மாட்டி, பூட்டிய இரும்புப் பெட்டிக்குள் போட்டு, சமுத்திரத்தின் அடியில் தூக்கிப் போட்டாலும், அடுத்த ஐந்தாவது நிமிடம் கம்பீரமாக வெளியே வந்து சிரிக்கும் மேஜிக் சூப்பர் ஸ்டார்.

ஹூடினிக்கு அறிவியல் மீது பெரிய பித்து இருந்தது. ஆனால் அதைவிட பெரிய ரணம் ஒன்று அவருக்குள் இருந்தது. அது என்னவென்றால், அவர் தாய் சிசிலியாவின் மறைவு.

அக்காலத்தில் லண்டனிலும் நியூயார்க்கிலும் ஸ்பிரிச்சுவாலிசம் கொடிகட்டிப் பறந்தது.

"உங்கள் செத்துப் போன தாத்தாவிடம் பேச வேண்டுமா? 5 டாலர் கொடுங்கள், கூப்பிடுகிறேன்" என்று மூலைக்கு மூலை போலி மீடியம்கள் கடை விரித்திருந்தார்கள்.

தாயின் பிரிவால் துயருற்ற ஹூடினியும், "உண்மையிலேயே ஆவிகளோடு பேச முடியுமா?" என்ற ஏக்கத்தில் இந்த மீடியம்களைத் தேடிப் போனார்.

போன இடத்தில் அவருக்குக் கிடைத்ததெல்லாம் ஏமாற்றம்.

இருட்டு அறையில் டேபிள் ஆடுவது, காற்றில் மிதக்கும் மணி, சுவரில் தட்டும் ஓசை என இவை அனைத்துமே மிகச் சாதாரணமான, அவர் மேடையில் செய்யும் மேஜிக் டிரிக்ஸ்கள்தான் என்பதை ஒரு நொடியில் கண்டுபிடித்தார்.

தாயின் துயரத்தை வியாபாரமாக்கிய அந்தப் போலி கும்பல் மீது ஹூடினிக்கு அளவுகடந்த கோபம் வந்தது.

விளைவு?

ஹூடினி டிரான்ஸ்பார்ம் ஆனார். மேஜிக் ஷோக்களைக் கொஞ்சம் ஒதுக்கிவிட்டு, போலி ஆவி நிபுணர்களை அம்பலப்படுத்தும் புதிய வேட்டையில் இறங்கினார்.

அவரது வேட்டை ஸ்டைலே தனி.

தாடி வைத்து, வேற்று உடையில், சாதாரண ஆளாக உருமாறிக் கொண்டு ஆவி அழைக்கும் இருட்டு அறைகளுக்குள் நுழைவார். அவர்கள் டேபிளைத் தட்டும் போது, "லைட்டைப் போடு!" என்று கத்துவார்.

பிறகு அங்கே என்ன நடக்கும்?

மீடியம்கள் காலின் கட்டைவிரலால் டேபிளைத் தட்டுவது, ரப்பர் பூட்ஸ் வைத்து மேசையை உயர்த்துவது, மெல்லிய நூலில் மணிகளைக் கட்டுவது என அவர்களின் அனைத்து தில்லுமுல்லுகளையும் அணுவணுவாகப் பிடித்து, செய்தியாளர்களை வைத்து அம்பலப்படுத்துவார்.

இதில் உச்சக்கட்ட காமெடி என்னவென்றால், ஷெர்லாக் ஹோம்ஸ் கதைகளை எழுதிய பிரபல எழுத்தாளர் சர் ஆர்தர் கோனன் டாய்ல், ஹூடினியின் நெருங்கிய நண்பர். டாய்ல் ஆவி உலகத்தை தீவிரமாக நம்பியவர்.

டாய்ல் ஹூடினியிடம், "ஹூடினி, நீ மேடையில் செய்யும் தப்பியோடும் வித்தைகள் சாதாரண மேஜிக் இல்லை. உனக்கு உண்மையிலேயே ஏதோ ஆவி உலகம் தந்த சக்தி இருக்கிறது. அதை மறைக்கத்தான் நீ மற்ற மீடியம்களைப் போலி என்கிறாய்!" என்று சீரியஸாக வாதித்தார்.

ஹூடினி தலையில் அடித்துக் கொண்டார். "யோவ் டாய்ல்! நான் செய்வதெல்லாம் வெறும் கைச்சலக்கம், அறிவியல், பிஸிக்ஸ்! எந்த ஆவியும் எனக்கு உதவவில்லை!" என்று கத்தியும் டாய்ல் நம்பவே இல்லை.

அறிவியலை எழுதும் எழுத்தாளர் மூடநம்பிக்கையில் மூழ்கிப்போக, மேஜிக் செய்யும் மாயாஜாலக்காரர் அறிவியலின் பக்கம் நின்ற விசித்திர நாடகம் அது!

அமெரிக்க நாடாளுமன்றம் வரை சென்று, இந்த போலி மீடியம்களைத் தடை செய்ய வேண்டும் என்று சட்டம் இயற்றப் போராடினார் ஹூடினி.

அது மட்டுமல்ல, அவர் இறந்தபோதும் ஓர் இறுதிப் பரிசோதனையைச் செய்து விட்டுப்போனார். தன் மனைவி பெஸ்ஸிடம் ஒர் இரகசியக் குறியீட்டு வார்த்தையைச் சொல்லிவிட்டு, "நான் இறந்த பிறகு எவனாவது என் ஆவியைக் கூப்பிடுவதாகச் சொன்னால், அவனிடம் இந்த வார்த்தையைச் சொல்லச் சொல். அப்படிச் சொன்னால் மட்டுமே அது என் ஆவி. இல்லையென்றால், அவன் ஏமாற்றுக்காரன்!" என்றார்.

ஹூடினி இறந்து பல ஆண்டுகள் வரை பல மீடியம்கள் முயற்சி செய்தார்கள். ஆனால் ஒருவராலும் அந்த இரகசிய வார்த்தையைச் சொல்ல முடியவில்லை.

இறந்த பிறகும் கூட, போலி ஆவி உலகத்தின் முகத்திரையைக் கிழித்து ஜெயித்துக் காட்டினார் ஹூடினி!

செத்தும் கொடுத்தான் சீதக்காதி என்பது போல, செத்தும் நிரூபித்தார் ஹூடினி!

ஆக, இனி உங்களுக்குச் சந்தேகமே வேண்டாம், ஆவி இருக்கிறதா இல்லையா என்று.

-           அட்ரஸைத் தேடுவோம்!

*****

ஆவிகளின் ஒளிவிலகல்

அமானுஷ்யத்தின் அட்ரஸ்

அட்ரஸ் - 68

ஆவிகளின் ஒளிவிலகல்

காரின் கதவுகள் தாழ்ப்பாளிட்டுக்கொள்ள, பின்புறக் கண்ணாடியில் நெடுமாறனின் முகம் புன்னகைக்க, இளவழகனின் இதயத் துடிப்பு 140ஐத் தொட்டது.

மூளை 'பயம்' என்ற ரசாயனத்தை ரத்தத்தில் பாய்ச்சியது. ஆனால், இளவழகனின் இயற்பியல் பயிற்சி பெற்ற மூளை, பயத்தையும் தாண்டி யோசிக்கத் தொடங்கியது.

"இளவழகன்! என் டிரிக்ஸைக் கண்டுபிடி பாப்போம்!" குரல் மீண்டும் கேட்டது.

இளவழகன் மூச்சை ஆழ்ந்து இழுத்துவிட்டான். அவனது கை மெதுவாகத் தன் சட்டைப் பையில் இருந்த சிறிய லேசர் பாயிண்டரை நோக்கியும், லேப்டாப்பின் விசைப்பலகையை நோக்கியும் நகர்ந்தது.

அவன் கண்ணாடியை நேரடியாகப் பார்க்காமல், அதன் ஒளியியல் பிம்பத்தைக் கவனித்தான்.

''நெடுமாறனின் முகம். ஆனால் அதன் விளிம்புகளில் லேசான சிவப்பு மற்றும் நீல நிற விளிம்புப் பிறழ்ச்சி தெரிகிறது. நிஜ ஆவி என்றால் ஒளிவிலகல் எப்படி நிகழும்?''

இளவழகன் உரக்கச் சிரித்தான்.

"பிரமாதமான டிரிக் சுவாமிஜி! அல்லது சுவாமிஜியின் ஆட்களா?"

பின் சீட்டில் இருந்த உருவம் லேசாக அசைந்தது.

"நான் நெடுமாறன்டா!" குரல் கரகரத்தது.

"இல்லை!" இளவழகன் சட்டென்று லேசர் பாயிண்டரை ஆன் செய்து, பின் சீட்டை நோக்கி அடித்தான்.

லேசர் ஒளி பின் சீட்டின் குளிர் காற்றில் இருந்த பனிப்புகையின் மீது பட்டு, ஒரு முப்பரிமாணக் கூம்பாக விரிந்தது. அது சீட்டின் மீது படாமல், நடுவானில் மிதந்த ஒரு மெல்லிய, ஒளிப்புகும் ஹோலோகிராமிக் திரை மீது விழுந்தது.

"பிசிக்ஸ் டிரிக்!" இளவழகன் வேகமாகக் கத்தினான்.

"மிஸ்டர் சுவாமிஜி! நீங்கள் போகும்போது என் காரின் பின் சீட் தலைப்பகுதியில் ஒரு சிறிய மினியேச்சர் புரஜெக்டர் அப்புறம் ஒரு ஸ்பீக்கரைப் பொருத்திவிட்டுப் போயிருக்கிறீர்கள்தானே? காரின் ஏசியை புளூடூத் மூலம் ஹேக் செய்து, குளிர்ச்சியை அதிகப்படுத்தி, பெப்சி பாட்டிலில் அடைக்கப்பட்ட உலர் பனிக்கட்டியை காரின் பின் சீட்டின் அடியில் உருக வைத்திருக்கிறீர்கள்தானே? அது உருவாக்கிய புகையில்தான் இந்த முப்பரிமாண பிம்பம் தெரிகிறது இல்லையா?"

காரின் கதவுகள் இன்னும் பூட்டியே இருந்தன.

"சரி இளவழகன்! பிம்பத்தையும் ஒலியையும் கண்டுபிடிச்சிட்ட. ஆனா கார் கதவு எப்படிப் பூட்டுச்சு? எஞ்சின் ஏன் ஆப் ஆச்சு? அதுக்கும் பிசிக்ஸ் இருக்கா?" குரல் இப்போது பிராஜெக்டர் ஸ்பீக்கரில் இருந்து தெளிவாகக் கேட்டது.

"ஓ அதுவா?" இளவழகன் லேப்டாப்பில் ஒரு கமாண்டை டைப் செய்தான்.

"ஓ மை மிஸ்டர் சுவாமிஜி! என் கார் சாதாரண கார் இல்லை. இது டெஸ்லா பாணி ஸ்மார்ட் கார்! காரின் கம்ப்யூட்டரை யாரோ வெளியில் இருந்து மொபைல் ஆப் மூலமாக ஹேக் பண்ணியிருக்கீங்க. அதான் எஞ்சின் ஆப் ஆகி கதவு பூட்டிருச்சு. ஆனா நீங்க ஒரு விஷயத்தை மறந்துட்டீங்க!"

"என்ன?"

"என் லேப்டாப் என் காரின் மெயின்பிரேமுடன் வைபை மூலம் நேரடியாக இணைக்கப்பட்டிருக்கு. நீங்க அனுப்பிய ஹேக்கிங் சிக்னலை என் லேப்டாப் பயர்வால் மூலம் பிளாக் பண்ணிடுச்சு. நான் இப்போ மெனுவல் ஓவர்ரைடு தர்றேன்!"

இளவழகன் லேப்டாப்பில் என்டரைத் தட்டினான்.

'கிளிக்!'

காரின் கதவுகள் திறந்துகொண்டன. எஞ்சின் மீண்டும் 'கர்ர்ர்' என்று கர்ஜித்துக்கொண்டு உயிர்பெற்றது. காரின் உள்புற விளக்குகள் பளிச்சென்று எறிந்தன.

பின் சீட்டில் இருந்த ஹோலோகிராம் பிம்பம் மறைந்தது. உலர்பனிப் புகை காரின் ஜன்னல் வழியே வெளியேறியது.

பின் சீட்டின் அடியில் மறைத்து வைக்கப்பட்டிருந்த சிறிய பிராஜெக்டரும், ஸ்பீக்கரும், சுவாமிஜியின் ஆள் அதை இயக்கப் பயன்படுத்திய டிரான்ஸ்மிட்டரும் இளவழகனின் கைக்கு வந்தன.

இளவழகன் காரை மீண்டும் ஸ்டார்ட் செய்து, கியரை மாற்றி பெரியகொத்தூர் சாலையைக் கடந்து, இடது புறம் திரும்பி, கோட்டூர் சாலையில் எண்பது கிலோ மீட்டர் வேகத்தில் ஓட்ட ஆரம்பித்தான்.

அமானுஷ்யம் என்பது நம் மூளைக்குள் இருக்கும் அறியாமையேயன்றி வேறில்லை. அறிவியலைச் சரியாகப் புரிந்து கொண்டால், அவை அனைத்தும் அறிவியல் ட்ரிக்தான் என்பதையும் புரிந்து கொள்ளலாம்.

இளவழகனின் கார் இப்போது இருட்டைக் கிழித்துக் கொண்டு ஆவி வேகத்தில் பறந்து கொண்டிருந்தது.

-           அட்ரஸைத் தேடுவோம்!

*****

பின் இருக்கையில் ஒருவன்

அமானுஷ்யத்தின் அட்ரஸ்

அட்ரஸ் - 67

கணினி காலத்துப் பேய்கள்

மழை கொட்டித் தீர்த்துக் கொண்டிருந்த ஒரு வெள்ளிக்கிழமை நள்ளிரவு.

பெரியகொத்தூரில் இருந்த அந்தப் பழைய பங்களாவின் முதல் தளத்தில், மெழுகுவர்த்தி வெளிச்சம் நடுங்கிக்கொண்டிருந்தது.

அறையின் நடுவே ஒரு பெரிய டேபிள். அதைச் சுற்றி மூவர்.

முதலாவதாக, கதிரேசன். ஓய்வுபெற்ற ராணுவ வீரர். ஆறு மாதத்திற்கு முன் விபத்தில் இறந்த தன் ஒரே மகன் நெடுமாறனின் ஆவியோடு பேசத் துடித்துக் கொண்டிருந்தார்.

இரண்டாவதாக, சுவாமிஜி அக்னீஸ்வரர். கழுத்து நிறைய ருத்ராட்சம், தாடி, கைகளில் பெரிய பெரிய மோதிரங்கள்.

மூன்றாவதாக, இளவழகன். இயற்பியலில் முனைவர் பட்டம் பெற்றவன், ஆனால் கையில் எப்போதும் ஒரு லேப்டாப்பும், நக்கலும் இருக்கும். கதிரேசனின் அண்ணன் மகன்.

"சுவாமிஜி! நிஜமாவே என் பையன் வருவானா?" கதிரேசன் குரல் நடுங்கியது.

"சந்தேகப்படாதீர்கள் கதிரேசன் அவர்களே! பிரபஞ்ச சக்திகளை இந்த மெழுகுவர்த்திச் சுடரில் ஆவாஹனம் செய்திருக்கிறேன். நெடுமாறனின் ஆவி இந்த அறையில்தான் சுற்றிக் கொண்டிருக்கிறது." சுவாமிஜி கண்ணை மூடி முணுமுணுத்தார்.

இளவழகன் தன் லேப்டாப்பைப் பார்த்தபடியே சிரித்தான். "சுவாமிஜி, நீங்க கத்துவதைக் கொஞ்சம் மெதுவா கத்துனா நல்லா இருக்கும். ஏன்னா, உங்க ஷூவுக்கு அடியில இருக்கிற அந்த புளூடூத் பிரஷர் பேடை நீங்க மிதிக்கும்போதுதான், டேபிளுக்கு அடியில இருக்கிற மினியேச்சர் மோட்டார் அதிர்ந்து சத்தம் உண்டாக்குது. சவுண்ட் கொஞ்சம் அதிகமா வருது!"

சுவாமிஜியின் கண் சட்டென்று திறந்தது.

லேசான அதிர்ச்சி.

"என்னடா தம்பி விளையாடுறியா?" என்றார் கதிரேசன்.

"விளையாட்டு இல்ல சித்தப்பா!" இளவழகன் தன் பாக்கெட்டில் இருந்து ஒரு சிறிய ஸ்பெக்ட்ரம் அனலைசரைக் காட்டினான்.

"அமைதியா இருங்க. இந்த சுவாமிஜி பண்ணுறது எல்லாமே பிசிக்ஸ் டிரிக். அறையில திடீர்னு குளிர்ற மாதிரி இருக்கிறதுக்குக் காரணம், அவர் பின்னாடி மறைச்சு வச்சிருக்கிற திரவ நைட்ரஜன் ஸ்ப்ரே. டேபிள் தானா ஆடுறதுக்குக் காரணம், மேஜை கால்களில் பொருத்தப்பட்டிருக்கும் மின்காந்தச் சுருள்கள். அந்தச் சுவரில் தெரியுற நிழல். அது வெறும் போர்ட்டபிள் புரொஜெக்டர் லேசர்!"

இளவழகன் லேப்டாப்பில் ஒரு பொத்தானை அழுத்த, அறையின் விளக்குகள் பளிச்சென்று எரிந்தன.

சுவாமிஜியின் முகத்தில் வியர்வை அரும்பியது. இளவழகன் எழுந்து போய், மேஜையின் அடியில் இருந்த கம்பிகளையும், சுவாமிஜியின் பாக்கெட்டில் இருந்த ரிமோட்டையும் வெளியே எடுத்து மேஜை மேல் போட்டான்.

"சுவாமிஜி, ஆவி உலகத்தோடு பேசுறது இருக்கட்டும். முதல்ல இந்த போர் டொன்ட்டி டிரிக்ஸை நிறுத்துங்க. சித்தப்பா, இவருக்கு நீங்க கொடுத்த ஐம்பதாயிரம் ரூபாயை வாங்கிட்டு இவரை வெளியே அனுப்புங்க. ஆவியாவது, ஒண்ணாவது. எல்லாமே வெறும் மூடநம்பிக்கை!" என்றான் இளவழகன் அலட்சியமாக.

சுவாமிஜி அமைதியாகத் தன் பையை எடுத்துக்கொண்டார். போகும்போது இளவழகனைப் பார்த்து ஒரு மாதிரி சிரித்தார். "தம்பி! அறிவியல் எல்லாத்தையும் விளக்கிடும்னு நினைக்கிறீங்க. நல்லது. ஆனா, சில கேள்விகளுக்குப் பதிலை அறிவியல் சொல்லாம இருக்குறதுதான் மனித குலத்துக்கு நல்லது" என்று சொல்லிவிட்டுப் படியேறி இறங்கி மறைந்தார்.

கதிரேசன் ஏமாற்றத்துடன் தலைகுனிந்தார். இளவழகன் தன் லேப்டாப்பை மூடிப் பையில் வைத்தான்.

"சரி சித்தப்பா! நான் கிளம்புறேன். மழை விட்டுருச்சு." என்று சொல்லிவிட்டு, தன் காரை நோக்கி நடந்தான்.

அப்போது மணி நள்ளிரவு 1:15.

பெரியகொத்தூர் கிராமமே ஆள்நடமாட்டமின்றி வெறிச்சோடிப் போயிருந்தது. கார் அமைதியாகக் கப்பி பெயர்ந்து, படுபாதாள பள்ளங்கள் நிறைந்த சாலையில் ஓடிக்கொண்டிருக்க, இளவழகன் மியூசிக் பிளேயரைப் போட்டான். பாட்டுக்குப் பதிலாக வெறும் ஹிஸ்ஸ்ஸ் என்ற எலக்ட்ரானிக் இரைச்சல் மட்டுமே வந்தது.

"ச்சைய் இது வேற!" என்று ப்ளேயரை ஆப் செய்யப் போனான்.

திடீரென்று காரின் ஏசி வெப்பநிலை தானாகக் குறையத் தொடங்கியது.

24°C... 18°C... 10°C... 0°C.

காருக்குள் இளவழகனின் மூச்சுக்காற்று பனியாக உறைந்து வெளியே வந்தது.

இளவழகன் திடுக்கிட்டான். "என்ன இது? ஏசி கம்ப்ரஸர் கோளாறா?"

அவன் டேஷ்போர்டைத் தொடுவதற்குள், காரின் ஸ்டீயரிங் வீல் தானாக இடப்பக்கம் திரும்பியது. கார் சாலையின் ஓரத்தில் சட்டென்று நின்று, எஞ்சின் ஆப் ஆனது.

இளவழகனுக்குள் முதன்முறையாக லேசான பயம் ஊடுருவியது. பாக்கெட்டில் இருந்த ஸ்பெக்ட்ரம் அனலைசரை எடுத்தான். அதன் டிஜிட்டல் திரையில் மின்காந்த அலைகளின் அளவு கற்பனை செய்ய முடியாத அளவுக்கு உச்சத்தைத் தொட்டு எர்ரர்  என்று காட்டியது.

"இட்ஸ் இம்பாசிபிள்! எந்தச் சாதனமும் இல்லாம இவ்வளவு பெரிய மின்காந்தப் புலம் உருவாக முடியாது!" இளவழகன் சுற்றும் முற்றும் பார்த்தான்.

அப்போது, காரின் ரிவர் வியூ மிர்ரர் மெதுவாக இறங்கியது.

பின் சீட்டில் ஏதோ ஓர் உருவம் உட்கார்ந்திருப்பது போன்ற பாரம். கார் பின்னால் லேசாகத் தாழ்ந்தது.

இளவழகனின் முதுகுத்தண்டில் ஒரு குளிர்ந்த காற்று உரசிச் சென்றது. காரின் பக்கவாட்டு அமைதிக்கு நடுவே, அவன் காதுக்கு மிக அருகில் ஒரு குரல் கேட்டது.

மிகவும் மெல்லிய, பனி படர்ந்த குரல்.

"இளவழகா! சுவாமிஜி சொன்ன டிரிக்ஸ் எல்லாம் கண்டுபிடிச்சியே. இப்போ என் டிரிக்ஸைக் கண்டுபிடி பாப்போம்!"

இளவழகன் மெதுவாகத் தலையைத் திருப்பி பின் சீட்டைப் பார்த்தான்.

அங்கே...

ஆறு மாதங்களுக்கு முன் விபத்தில் சிதைந்து போன நெடுமாறனின் முகம், மிகத் தெளிவாக, வெளிச்சத்தைக் கக்கியபடி புன்னகைத்துக் கொண்டிருந்தது.

காரின் நான்கு கதவுகளும் வெளியே இருந்து பூட்டிக்கொண்டன.

-           அட்ரஸைத் தேடுவோம்!

*****

தேடல் எண் 7302

தேடல் எண் 7302

எண்களுக்கு இரக்கமில்லை. சென்னை மாநகராட்சியின் கண்காணிப்பில் இப்போது 7,302 என்றோர் எண் பெரும் பரபரப்பை ஏற்படுத்தியிருக்கிறது.

அது வெறும் எண்ணல்ல; சீருடை அணியாத, புத்தகப் பையைக் கழற்றி வைத்த, காலையில் பள்ளி மணியடிக்கும் போது வீட்டின் வாசற்படியில் அமைதியாக உட்கார்ந்திருக்கும் குழந்தைகளின் கூட்டுத்தொகை.

திருவான்மியூர் குப்பம், எழில் நகர், கண்ணகி நகர் என இந்த ஊர்ப் பெயர்களை வரைபடத்தில் பார்ப்பது எளிது. ஆனால், அங்குள்ள குறுகலான சந்துகளில் நடந்துபோனால் வறுமை எந்தச் சத்தமும் இல்லாமல் கதவை அடைப்பதைப் பார்க்கலாம்.

ஒரு குழந்தையைப் பள்ளியிலிருந்து வெளியேற்ற பெரிய காரணங்கள் தேவையில்லை; அப்பாவுக்கு வேலை இல்லாமல் போனால் போதும், வீட்டில் அடுப்பு எரியாவிட்டால் போதும். கல்வி என்பது வயிற்றுப்பசிக்கு அடுத்தபடியாகவே நினைவுக்கு வருகிறது.

அரசு இப்போது தரவுகளைத் தோண்டுகிறது. EMIS தரவுக்குள் இத்தனை பெயர்கள் விடுபட்டிருக்கின்றன. ஏற்கனவே 1,200 பேரைத் தேடிக் கண்டுபிடித்து வகுப்பறைக்குத் திருப்பியனுப்பியிருக்கிறார்கள். 130 பேர் விலகத் தயாராக நின்றிருந்தபோது கைபிடித்துத் தடுத்து நிறுத்தியிருக்கிறார்கள். மீதமிருக்கும் 7,302 பேரைத் தேட 96 களப்பணியாளர்கள் வீதி வீதியாகப் புறப்படுகிறார்கள்.

களப்பணியாளர்கள் வீடுகளின் கதவுகளைத் தட்டுவார்கள். "ஏன் பள்ளிக்கு வரவில்லை?" என்று கேட்பார்கள். ஒரு குழந்தையின் பதில் ஒருபோதும் எளிமையானதாக இருக்காது. "நிதிச்சிக்கல்" என்பது அதிகாரப்பூர்வ அறிக்கைகளில் பயன்படும் ஒரு மென்மையான சொல். அதன் உண்மையான அர்த்தம், "இன்றைய சோற்றுக்கே வழியில்லை, நாளைய படிப்பைப் பற்றி எப்படி யோசிப்பது?" என்பதுதான்.

சென்னை மாநகராட்சி ஆணையர் ஒரு காலக்கெடுவை நிர்ணயித்திருக்கிறார். நாள்காட்டியில் ஒரு தேதியை வட்டமிட்டுவிட்டால் மனித வாழ்வின் சிக்கல்கள் அனைத்தும் தீர்ந்துவிடுமா? தெரியவில்லை. ஆனால், கதவைத் தட்டுவது ஒரு நல்ல தொடக்கம்.

பள்ளி என்பது நான்கு சுவர்களும் ஒரு கரும்பலகையும் கொண்ட கட்டிடம் மட்டுமல்ல; அது ஒரு குழந்தையின் எதிர்காலத்தை வறுமையின் பிடியிலிருந்து மீட்டுப் பத்திரப்படுத்தும் இடம்.

7,302 குழந்தைகளில் ஒவ்வொரு குழந்தையாக மீண்டும் பள்ளிக்குத் திரும்பும்போது, ஒரு பெரிய நாகரிக சமூகம் தன் கூட்டு குற்ற உணர்ச்சியைச் சற்று குறைத்துக்கொள்ளக்கூடும்.

காலக்கெடு நெருங்குகிறது. கதவுகள் தட்டப்படுகின்றன. குழந்தைகள் காத்துக்கொண்டிருக்கிறார்கள். அக்குழந்தைகள் பள்ளியை நோக்கி வருவார்கள் என்று நம்புவோம். நம்பிக்கையே நல்லது. ஒவ்வொரு குழந்தைக்கும் இங்கு கல்விக்கான வாய்ப்பு உள்ளது.

*****

கல்வி & பொது அறிவுச் செய்திகள் – 28.08.2026

கல்வி & பொது அறிவுச் செய்திகள் – 28.08.2026

1) நேபாள வெள்ளத்தில் உயிரிழந்தோரின் எண்ணிக்கை 392 ஆக அதிகரித்துள்ளது. 1500 பேரை மீட்கும் பணி தீவிரமாகியுள்ளது.

2) நேபாள வெள்ளத்திற்குப் பெரும் பனிப்பாறை சரிவே காரணம் என்று முதல் கட்ட ஆய்வுகள் தெரிவிக்கின்றன.

3) எம்.எட் சேர்க்கைக்கான விண்ணப்பப் பதிவு செப்டம்பர் 10 வரை நீட்டிக்கப்பட்டுள்ளது.

4) தமிழக வரலாற்றில் நேற்று முதல் முறையாக சட்டப் பேரவை எவ்வித இடைவேளையும் இன்றி 9.43 மணி நேரம் நடைபெற்று உள்ளது.

5) 2026 ஆம் நிதியாண்டில் இந்தியாவின் மொத்த உள்நாட்டு உற்பத்தி 6.4 சதவீதமாக இருக்கும் எனக் கணிக்கப்பட்டள்ளது.

Education & GK News

1) The death toll from the floods in Nepal has risen to 392; rescue operations to save 1,500 people have intensified.

2) Preliminary studies indicate that a massive glacier collapse is the cause of the floods in Nepal.

3) The application registration period for M.Ed. admissions has been extended until September 10.

4) For the first time in Tamil Nadu's history, the Legislative Assembly session was held yesterday for 9 hours and 43 minutes without any break.

5) India's Gross Domestic Product (GDP) is projected to stand at 6.4 percent in the 2026 fiscal year.

மிக மோசமான பேய் வீடு!

அமானுஷ்யங்களின் அட்ரஸ்

அட்ரஸ் – 66

மிக மோசமான பேய் வீடு!

பேய்கள் இருக்கிறதா இல்லையா என்கிற கேள்விக்கு ஆண்டிப்பட்டி அப்புசாமி முதல் ஆல்பர்ட் ஐன்ஸ்டீன் வரை ஆளுக்கொரு பதில் வைத்திருப்பார்கள். ஆனால் 1920களில் லண்டனில் ஒரு மனிதர் இருந்தார். பெயர் ஹாரி ப்ரைஸ்.

கையில் கேமரா, தெர்மோமீட்டர், அகச்சிவப்பு கதிர்கள், நூலால் கட்டப்பட்ட தராசு என்று ஒரு மினி லேபாரட்டரியையே தூக்கிக்கொண்டு அலைந்த ஆள். அறிவியலையும் ஆவிகளையும் ஒரே நேர்கோட்டில் சந்திக்க வைக்க முயன்ற ஒரு விசித்திரமான கேரக்டர்.

அந்தக் காலத்தில் லண்டனில் ஸ்பிரிச்சுவாலிசம் ரொம்ப பிரபலம். இருட்டு அறையில் உட்கார்ந்து கொண்டு, "ஆவியே வா!" என்று கூப்பிட்டு, டேபிளைத் தட்டி, ஆவிகளுடன் பேசுவதாகச் சொல்லும் மீடியம் ஆட்களுக்குப் பஞ்சமில்லை.

ஹாரி ப்ரைஸுக்கு ஒரு விசித்திரமான இரட்டை முகமுண்டு. அவர் பேய்கள், ஆவிகள் உண்மையிலேயே இருக்கலாம் என்று தீவிரமாக நம்பினார். ஆனால், ஆவி உலகத்தோடு பேசுகிறேன் என்று ஏமாற்றும் போலி ஆட்களைக் கண்டால் அவருக்குக் வயிறு எரியும். அவர்களின் முகத்திரையைக் கிழித்தெறிந்தால்தான் நிம்மதி.

அவர் அமைத்த தேசிய மனநல ஆராய்ச்சி ஆய்வகம் ஒரு நவீன அறிவியல் கூடம். ஆவி அழைக்கும் போலி மீடியங்களை அந்த லேப்புக்கு அழைப்பார். அறையில் அகச்சிவப்பு கேமராக்கள் வைப்பார். அவர்களின் கை, கால்களில் மின்சார கம்பிகளைக் கட்டி, சின்ன அசைவு நடந்தாலும் கண்டுபிடிக்கும்படி செய்துவிடுவார். பல "ஆவி நிபுணர்கள்" இவரிடம் மாட்டிக்கொண்டு, "ஐயோ சாமி, ஆவியாவது ஒண்ணாவது, எல்லாம் மேஜிக் ட்ரிக்தான்!" என்று அலறி அடித்து ஓடினார்கள். 'ஜாதகக் காரர்களின் கைவரிசையை' அம்பலப்படுத்தும் தீவிர விஞ்ஞானியாகவே பத்திரிகைகள் அவரைப் பார்த்தன.

ஆனால், 1929 இல் கதை ஒரு பெரிய யு டர்ன் எடுத்தது.

போர்லி ரெக்டரி என்பது எஸெக்ஸ் பகுதியில் இருந்த ஒரு பழைய மதகுருவின் வீடு. "அங்கே இரவில் மணி அடிக்கிறது, சுவரில் தானாக எழுத்துக்கள் தோன்றுகின்றன, தலை இல்லாத கன்னியாஸ்திரி நடமாடுகிறாள்" என்று செய்திகள் வந்தன. ஹாரி ப்ரைஸ் அங்கே விரைந்தார்.

அந்த வீட்டை ஒரு வருடம் வாடகைக்கு எடுத்தார். நாற்பதுக்கும் மேற்பட்ட பார்வையாளர்களை, ஆராய்ச்சியாளர்களை உள்ளே இறக்கினார். சுவர்களில் பாதரசத் துளிகள், வெப்பநிலையைக் அளக்கும் கருவிகள், தரைப்பகுதியில் சீல் வைக்கப்பட்ட கதவுகள் என அந்த வீடே ஒரு பெரிய பரிசோதனைக்கூடமாக மாறியது.

பத்திரிகைகளுக்கு இது அல்வா சாப்பிடுவது போல இருந்தது. டெய்லி மெயில் இதழில் தினமும் போர்லி ரெக்டரி பற்றிய பரபரப்புச் செய்திகள். "பிரிட்டனின் மிக மோசமான பேய் வீடு" என்று அந்த இடத்திற்குப் பிரமாண்ட பிராண்ட் இமேஜ் உருவாக்கிக் கொடுத்தவர் ஹாரி ப்ரைஸ்தான்.

அங்கே நிஜமாகவே பேய் இருந்ததா?

ப்ரைஸ் எழுதிய புத்தகங்கள் விற்றுத் தீர்ந்தன. அவர் ஒரு மீடியா சூப்பர் ஸ்டாரானார். ஆனால் அவரது காலத்திற்குப் பிறகு, சக ஆராய்ச்சியாளர்கள் அந்த ஆதாரங்களைச் சோதித்துப் பார்த்தபோதுதான் அந்த அதிர்ச்சிகரமான உண்மை தெரியவந்தது.

போர்லி ரெக்டரியில் நடந்த பல விசித்திர நிகழ்வுகள், ஹாரி ப்ரைஸே சொந்தமாக உருவாக்கிய "ஸ்பெஷல் எபெக்ட்ஸ்" என்பதும், செய்தித்தாள் விளம்பரத்துக்காக அவர் செய்த சிறுபிள்ளைத்தனமான வேலைகள் என்பதும் வெளியுலகத்துக்குத் தெரிய வந்தன.

ஹாரி ப்ரைஸ் ஒரு தீர்க்க முடியாத புதிர். அவர் அறிவியலை வைத்துப் பேயைத் தேடினாரா, அல்லது பேயை வைத்துத் தன்னை விளம்பரப்படுத்திக் கொண்டாரா? என்பது விடை காண முடியாத கேள்வி.

ஒன்று மட்டும் நிச்சயம். அறிவியல் உலகமும் ஆவி உலகமும் சந்திக்கும் புள்ளியை மிகச் சரியாகப் பயன்படுத்திக் கொண்டு பிரபலமானவர் யார் என்று கேட்டால், இருபதாம் நூற்றாண்டின் தொடக்கத்தில், கைநிறைய கேமராக்களோடு நின்றுகொண்டிருந்த ஹாரி ப்ரைஸைச் சுட்டிக்காட்டலாம்!

-           அட்ரஸைத் தேடுவோம்!

*****

உலக்கை அடியும் மிளகாய்ப் பொடியும்

அமானுஷ்யங்களின் அட்ரஸ்

அட்ரஸ் – 65

உலக்கை அடியும் மிளகாய்ப் பொடியும்

தமிழரசனால் நடந்ததை நம்ப முடியவில்லை. வீட்டிற்கு வந்தும் தன் கருவிகளைச் சோதித்துப் பார்த்துக் கொண்டிருந்தான். அவனது மொபைல் போன் அதிர்ந்தது. விஜயராமன் என்ற பெயர் திரையில் மின்னியது.

தமிழரசன் அழைப்பை ஏற்று, "டேய்! என்னை ஆபத்துல சிக்க வைக்கிறதே உனக்கு வேலையா போயிடுச்சுல்ல. உசுரோட போனா பொணமா திரும்புற இடத்துக்கு யாராவது தன் நண்பனை அனுப்புவானா? உனக்கு நண்பனை விட, ஆராய்ச்சி முக்கியமா போயிடுச்சுல்ல." என்று கோபத்துடன் பேசத் தொடங்கினான்.

மறுமுனையில் விஜயராமனின் சிரிப்பொலி மெலிதாகக் கேட்டது. "தமிழ்ப்பிரியன் தமிழரசன்! உன் உயிரை அப்படிப் பொக்குன்னு போக விட்டுருவோமா? நீ பண்ண வேண்டிய ஆவி ஆராய்ச்சி இன்னும் நிறைய இருக்கு. நீ அங்க போறதுக்கு முன்னாடியே அந்தப் பண்ணை வீட்டுல ஹிட்டன் வயர்லெஸ் ஸ்பெக்ட்ரம் கேமரா செட் பண்ணியாச்சு. நீ நேத்து ராத்திரி பார்த்த குப்பாயியை நாங்க இங்க ஸ்கிரீன்ல லைவ்வா பார்த்தாச்சு!"

தமிழரசன் திகைத்துப்போனான். "நீ பாத்தீயா? அப்போ அது நிஜமான ஆவிதானா?"

"ஆவியாவது, பிசாசாவது! அந்த லைவ் வீடியோவைக் கம்ப்ளீட் டேட்டா அனாலிஸ் பண்ணியிச்சு. அது ஆவி இல்ல. அது ஒரு பியூர் ஹைடெக் டிராமா!"

"என்னடா சொல்றே? இந்த மாதிரி டிராமா எழுதுறதெல்லாம் உன்னோட வேலையாச்சே. அங்க எவன் உக்காந்து டிராமா எழுதினான்?"

"அதுக்கு பின்னாடி ஒரு மல்டி நேஷனல் டிரக் மாபியாவே இருக்கு. சுந்தர் சி-யோ, ராகவா லாரன்ஸோ எடுக்க இது காமெடி ஹாரர் ஸ்கிரிப்ட் இல்லடா! லோகேஷ் கனகராஜ் எடுக்க வேண்டிய எல்.சி.யூடா இது."

தமிழரசன் ஜன்னலைப் பார்த்துக்கொண்டே, "அட பாவிகளா! ஆவிகிட்ட மாட்டுனா கூட, போனா போறான் இந்தத் தமிழ்க்கிறுக்கன்னு விட்டுடும். டிரக் மாபியாகிட்டெ மாட்டுனா எங்கதி என்னாவுறது? என் குடும்பம் என்னாவுறது? அது இருக்கட்டும். நான் பார்த்த அந்த அக்மார்க் வெள்ளைப் புடவை பொண்ணு? எனக்கு மண்டையே வெடிச்சிடும் போலிருக்கு!" என்றான்.

"அங்கே வச்ச கேமரால பதிவான அலைநீளத்தை வச்சு கண்டுபிடிச்சிட்டோம். அந்த அறையோட வடகிழக்கு மூலையில ஒரு சிறிய மைக்ரோ ஹோலோகிராபிக் ப்ரொஜெக்டர் மறைச்சு வைக்கப்பட்டிருக்கு. அதுல டைமர் செட் பண்ணி, பன்னிரண்டு மணிக்கு 3டி ஹோலோகிராம் பிம்பத்தை காத்துல காட்டியிருக்காங்க. அதனாலதான் நீ அடிச்ச லேசர் ஒளி அது வழியா ஊடுருவிப் போனது!"

"அப்போ அந்தப் பெண் குரல்?"

"சுவற்றுக்குள்ள பீஸோ எலக்ட்ரிக் ஸ்பீக்கர் புதைச்சு வச்சிருக்காங்க. அது அதிர்வுகளை உருவாக்கும்போது, அறையோட சுவர்களே சவுண்ட் போர்டு மாதிரி வேலை செய்யும். அதனாலதான் 3டி ஸ்பேஷியல் ஆடியோ எபெக்ட்ல அந்த குரல் நாலா பக்கமும் கேட்டிருக்கு."

தமிழரசன் வியப்பின் எல்லைக்கே சென்றான். "ஆனா, இதையெல்லாம் இவ்வளவு தொழில்நுட்பத்தோடு யாருடா பண்ணிருப்பாங்க?"

"அதுதான் மெயின் மேட்டர்! உனக்கே தெரியாமா அங்க வெச்ச நம்மோட கேமரா அந்த கெஸ்ட் ஹவுஸுக்கு அடியில இருக்குற தரைப்பகுதியைத் தெர்மல் இமேஜிங்  முறையில ஸ்கேன் பண்ணிடுச்சு. உலக நாயகன் கமலஹாசன் நடிப்புல லோகேஷ் கனகராஜோட 'விக்ரம்' படத்துல வருமே, அதே மாதிரி இந்த பண்ணை வீட்டுக்கு அடியில மிகப்பெரிய பரப்பளவுல ஒரு நிலத்தடி போதைப்பொருள் தயாரிப்புக் கூடம் இயங்கிக்கிட்டு இருக்கு! மெத்தம்பெட்டமைன், எல்.எஸ்.டி, கேட்டமைன்னு ரொம்ப பெரிய வேலைகளப் பண்ணிக்கிட்டு இருக்காங்க."

"என்னது! நிலத்தடி போதைப்பொருள் தயாரிப்புக் கூடமா?" தமிழரசன் அதிர்ந்தான்.

"ஆமா! அந்த நார்கோடிக் லேப்ல கெமிக்கல்ஸ் சுத்திகரிக்கும் போது உருவாகுற எக்ஸாஸ்ட் பேன் சத்தமும், கெமிக்கல் புகையும் வெளியே தெரியாம இருக்கவும், யாராவது தப்பித்தவறி இந்தப் பக்கம் வந்தா மிரண்டு ஓடணும்ங்கிறதுக்காகவும்தான் இந்த ஹைடெக் குப்பாயி பேய் நாடகத்தையே அவங்க ஆடியிருக்காங்க. அந்தப் பகுதி பக்கமே யாரும் வராம இருக்கத்தான் 'இங்கே போனா பிணம்தான் வரும்'னு ஊருக்குள்ள கதையைக் கட்டி விட்டிருக்காங்க!"

"டேய் என்ன வேலைடா பண்ணி வெச்சிருக்கீங்க. என் வீடு என்ன விக்ரம் கமல் வீடா? ஏஜென்ட் ருத்ரன், ஏஜென்ட் லாரன்ஸ், ஏஜென்ட் டீனான்னு என் வீட்டுல யாருமே இல்லையேடா. இந்த மேட்டர் தெரிஞ்சு, அந்த டிரக் மாபியா என்னோட வீட்டைச் சுத்தி வளைச்சா நான் என்ன பண்றது?" தமிழரசன் அதிர்ந்தான்.

"அய்யனார் கோயில் சந்துல இருக்குற அய்யனார் உன்னைக் காப்பாத்தாமலா போயிடுவார்?"

"டேய் விளையாடாதே. வீட்டுல நான், ஜெயந்தி, அப்புறம் ஜெயந்தியோட அப்பா மூணு பேரும் இருக்கோம். நல்ல வேளையா கபிலனை என்ஜினியரிங் காலேஜ்ல அட்மிஷன் போட்டுட்டு அங்கேயே விட்டுட்டு வந்திருக்கோம்."

"நீ ஒன்னும் பயப்பட தேவையில்லை. அங்க செட் பண்ணியிருக்கிற தெர்மல் இமேஜிங் கேமரா, ஆட்டமேடிக்கா அது பாட்டுக்கு ஆதாரங்களோட போதைப்பொருள் தடுப்புப் பிரிவு போலீஸுக்குத் தகவல் அனுப்பிட்டே இருக்கும். அப்படி ஓர் அல்காரிதம் செட் பண்ணிருக்கிறோம். இந்நேரத்துக்கு போலீஸ். அவங்க என்கவுண்டர் டீமோட கிளம்பி அங்கே வேலையை ஆரம்பிச்சிருப்பாங்க!" விஜயராமன் சொல்லி முடிப்பதற்குள், தமிழரசன் வீட்டின் வாசலில் ஒரு ஜீப் வந்து அலறியபடி நின்றது.

தமிழரசன் பயத்தில் நடுங்கிக் கொண்டே ஜன்னல் வழியாக எட்டிப் பார்த்தான்.

ஜீப்பில் இருந்து இறங்கியது தமிழரசனைப் பாராட்டுவதற்காக வந்த போதைப்பொருள் தடுப்புப் பிரிவு போலீஸ் இல்லை; மாறாக, லோகேஷ் கனகராஜ் பட பாணியில் முகமூடி அணிந்த நாலைந்து பேரைக் கொண்ட துப்பாக்கி ஏந்திய கும்பல்! டிரக் மாபியாவின் ரவுடி நெட்வொர்க்.  விஜயராமனின் ஹேக்கிங்கைச் சற்றே மோப்பம் பிடித்துவிட்டு, தமிழரசன் வீட்டைச் சுற்றி வளைத்திருந்தது.

"டேய் விஜயராமன்! நீ பண்ண காரியத்தாலே ரோலக்ஸ் அனுப்புன டீம் என் வீட்டு வாசல்ல நிக்குதுடா!" என்று தமிழரசன் கதறினான்.

மறுமுனையில் விஜயராமன் அமைதியாக, "தமிழ்ப்பிரியன் தமிழரசன்! பதறாதே. விக்ரம் படத்துல ஏஜென்ட் டீனா சமையலறை கரண்டியை வச்சே சண்டை போடுவாங்கள்ல? அதே மாதிரி உன் வீட்லயும் ஓர் ஏஜென்ட் இருக்கார்." என்றான்.

"யாருடா? என் மாமனாரா?!"

அடுத்த நொடி, தமிழரசனின் மாமனாரான ஜெயந்தியின் அப்பா கையில் ஒரு பெரிய மர உலக்கையோடும், காதில் இயர்பட்ஸ் உடனும் ஹாலுக்குள் வந்தார். கதவு திறந்ததும், துப்பாக்கியை நீட்டியபடி உள்ளே நுழையப் பார்த்த முதல் ரவுடியின் மண்டையிலேயே "டமாங்!" என உலக்கையால் ஒரு போடு போட்டார்.

சமையலறையில் இருந்த மிளகாய்ப் பொடி டப்பாவை எடுத்து வந்த ஜெயந்தி, அடுத்த இரண்டு ரவுடிகளின் கண்ணில் அள்ளித் தெளித்தாள்.

அங்கே ஒரே கூச்சலும் குழப்பமும் நிலவியது. தமிழரசன் பயத்தில் பேசிக் கொண்டிருந்த போனைத் தூக்கித் தூர எறிந்து விட்டு, சோபாவுக்கு பின்னால் ஒளிந்து கொண்டான்.

அவன் மாமனார் வெறியோடு உலக்கையைச் சுழற்றிக் கொண்டிருந்தார்.

சரியாக அதே நேரத்தில், வீதி முனையிலிருந்து சைரன் ஒலியுடன் என்.சி.பி போலீஸின் என்கவுண்டர் டீம் வந்து இறங்கியது.

கையில் துப்பாக்கியுடன் உள்ளே பாய்ந்த என்.சி.பி அதிகாரி, வீட்டில் நடப்பதைப் பார்த்து அப்படியே உறைந்து போய் நின்றார்.

ரவுடிகள் அனைவரும் கண்ணில் மிளகாய்ப் பொடியோடு அலறிக்கொண்டு, "சார்! எங்களைக் காப்பாத்துங்க சார்! போலீஸ் லாக்கப்ல அடிக்கிற அடியைக் கூட தாங்கிடுவோம். ஆனா இந்த உலக்கை தாத்தா அடிக்கிற அடியைத் தாங்க முடியாது சார்! எங்களை உடனே ஜெயில்ல அடைச்சுடுங்க!" என்று போலீஸின் கால்களில் விழுந்து கெஞ்சினார்கள்.

என்.சி.பி அதிகாரி தமிழரசனைப் பார்த்து, "சார், நீங்கதான் ஏஜென்ட் தமிழ்மித்ரனா? என்ன ஒரு பக்காவான பிளானிங்! எந்த ஆயுதமும் இல்லாம மாபியாவையே சரணடைய வச்சிட்டீங்களே!" என்று பாராட்டிவிட்டு ரவுடிகளைக் கைது செய்து கூட்டிச் சென்றார்.

தமிழரசன் பெருமூச்சு விட்டுக்கொண்டே தூக்கிப் போட்டிருந்த போனை எடுத்தான்.

"டேய் விஜயராமன்! என் மாமனாரோட உலக்கையும் என் பொண்டாட்டியோட மிளகாய்ப் பொடியும் இல்லன்னா என்னோட கதி, நெனைச்சுப் பார்க்கவே பயமா இருக்குடா!"

"நன்றி தமிழ்ப்பிரியன் தமிழரசன்! அடுத்த சாப்டருக்கு ரெடியா இரு!"

"ஆளை விடுடா சாமி! இனிமே நான் ஆவி ஆராய்ச்சியும் பண்ணல, அறிவியல் த்ரில்லருக்கும் வரல. பேசாம இப்படியே பிள்ளைங்களுக்குப் பாடம் சொல்லிக் கொடுக்குற ஆசிரியராவே காலத்தைக் கழிச்சிடுறேன்!" என்று சொல்லிவிட்டுத் தமிழரசன் போனைத் துண்டித்தான்.

-  அட்ரஸைத் தேடுவோம்!

*****