காலுக்குச் செருப்புமில்லை – ஜீவாவின் பாடல்

காலுக்குச் செருப்புமில்லை – ஜீவாவின் பாடல்

(ஜனவரி 18 - ஜீவாவின் பிறந்த நாள்)

காலுக்குச் செருப்பு மில்லை

கால்வயிற்றுக் கூழுமில்லை

பாழுக் குழைத்தோ மடா – என் தோழனே

பசையற்றுப் போனோ மடா. (காலுக்கு)

குண்டிக்கொரு துண்டு மில்லை

கொல்வறுமை தாள வில்லை

ஒண்டக் குடிசை யில்லை – என் தோழனே

உழைத்திளைத்துப் போனோ மடா. (காலுக்கு)

நோய்நொடிகள் வெம்புலி போல்

நூறுவிதம் சீறு வதால்

தாய்தந்தையர் பெண்டு பிள்ளை –என் தோழனே

சாய்ந்து விழக் கண்டோமடா. (காலுக்கு)

பாலின்றிப் பிள்ளை அழும்

பட்டினியால் தாய ழுவாள்

வேலையின்றி நாம ழுவோம் – என் தோழனே

வீடுமுச் சூடும் அழும். (காலுக்கு)

கையிலொரு காசு மில்லை

கடன் கொடுப்பாரு மில்லை

செய்யும் தொழில் கிட்ட வில்லை – என் தோழனே

திட்டாட்டம் கொல்லுதடா. (காலுக்கு)

வாங்கிய கடன் தீர்க்க

வக்கில்லை யானாலும்

ஏங்கி யிரந்துண்ண வோ – என் தோழனே

எங்கள் மனம் கூசுதடா. (காலுக்கு)

கொச்சைப் பிழைப்பறி யோம்

கொலை திருட்டும் அறியோம்

இச்சகப் பேச்சறி யோம் – என் தோழனே

எத்தும் புரட்டறி யோம். (காலுக்கு)

கோணல் மாணல் திட்டங்களால்

கோடி கோடி யாய்க்குவித்தே

வீணா்சிலர் கொழுக்கக் கண்டால் – என் தோழனே

வெஞ்சினம் பொங்கு தடா. (காலுக்கு)

மாடமாளிகைய வர்க்கு

மன்னர் மகுடம வர்க்கு

வாட வறுமை நமக்கு – என் தோழனே

வந்திடல் வாழ்வெதற்கு. (காலுக்கு)

ஒன்றுபட்டுப் போர்புரிந் தே

உயர்த்துவோம் செங்கொடியை

இன்றுடன் தீருமடா – என் தோழனே

இம்சை முறைக ளெல்லாம்.

காலுக்குச் செருப்பு மில்லை

கால்வயிற்றுக் கூழுமில்லை

பாழுக் குழைத்தோ மடா – என் தோழனே

பசையற்றுப் போனோ மடா.