மினிமலிஸம் – சரியான வாழ்க்கைத் தத்துவம்
பெரும்பாலான
புலனப் பதிவுகளிலும், முகநூல் பதிவுகளிலும் மினிமலிஸம் குறித்து வாசித்த போது அசந்து
போனேன். அநேகமாக என் வாழ்க்கை முறை அப்படித்தான் இருக்கிறது. யாரோ என் வாழ்வைப் படமெடுத்த
போட்டது போல்தான் இருந்தது மினிமலிஸம் குறித்த கருத்துகளை வாசித்த போது. நீங்களும்
படித்திருப்பீர்கள். நல்ல கருத்துகளை எத்தனை முறைப் படித்தாலும் குறையொன்றும் நேர்ந்து
விடப் போவதில்லை. நல்ல கருத்துகளை மீண்டும் மீண்டும் வாசிக்கும் போது உண்டாகும் ஆழமான
புரிதல் நம்மையும் அறியாமல் நம்மிடம் ஒரு மாற்றத்தை உண்டு பண்ணுகிறது. அதனால் மினிமலிஸம்
குறித்து எனக்கு வந்தப் பதிவுகளை மீண்டும் உங்களது பார்வைக்குப் பதிவிட விரும்புகிறேன்.
மினிமலிஸம்
மினிமலிஸத்தை நிறைவைத் தரும் நிஜ வாழ்க்கை முறை எனக்
குறிப்பிடலாம்.
மினிமலிஸத்தின்
தோற்றம்
ஜோஷூவா பீல்ட்ஸும், ரியான் நிகோடெமெஸும் தகவல் தொழில்நுட்பத்
துறையில் ஆறு இலக்க சம்பளம், கார்கள், வீடுகள், விருந்து, கொண்டாட்டம் என சகல வசதியோடு
வாழ்க்கையை அனுபவித்த இளைஞர்கள். அவர்கள் தங்கள் வாழ்க்கையில் எல்லாம் இருந்தும் ஏதோ
குறைவதை உணர்ந்தார்கள். வாழ்வில் ஒரு வெற்றிடம் இருப்பதை அறிந்தார்கள். வாரத்தில்
80 மணி நேரம் உழைப்பதும், உழைத்த பணத்தில் எதை எதையோ வாங்கி வாங்கிக் குவிப்பதும் மகிழ்ச்சியில்லை
என்பதை உணர்ந்தார்கள். மகிழ்ச்சி என்பது நுகர்வு கலாசாரத்தில் இல்லை என்பதை புரிந்துகொண்ட
நொடியில் அவர்களுக்குத் தோன்றிய கோட்பாடே மினிமலிஸம் என்பதாகும்.
மினிமலிஸத்தின்
அடிப்படை
இன்று நம்மைச் சுற்றி நுகர்வுக் கலாசாரம் பெருகி
விட்டது. பொருள்களை வாங்குவதுதான் மகிழ்ச்சி, அதுவே சாதனை என்கிற கருத்து பரவி வருகிறது. உண்மையில் பொருள்களை வாங்குவதில் மகிழ்ச்சியில்லை.
அதை எந்த அளவுக்குப் பயன்படுத்துகிறோம் என்பதில்தான் இருக்கிறது. மினிமலிஸத்தின் அடிப்படை
இதுதான்.
மினிமலிஸம்
குறித்த சரியான புரிதல்
மினிமலிஸம் என்றால் கஞ்சப்பிசினாரியாக வாழ்வது என்று
நினைக்கிறார்கள். அல்லது எல்லாவற்றையும் விலக்கி விட்டுத் துறவியைப்போல வாழ்வது என்றும்
நினைக்கிறார்கள். ஆனால் மினிமலிஸம் என்பது கஞ்சப்பிசிரித்தனமும் இல்லை, துறவு வாழ்க்கையும்
இல்லை. மினிமலிஸம் என்பது அவசியமானவற்றுடன் அளவாக வாழ்வது ஆகும். உடலில் தேவையில்லாத
கொழுப்பு சேர்ந்தால் நோய்கள் எப்படி வருமோ அதுபோலத்தான் வாழ்க்கையில் தேவையில்லாத பொருள்கள்
சேர்வதும். இடநெருக்கடியில் தொடங்கி பணநெருக்கடி வரை அனைத்திற்கும் காரணமாக இருப்பது
இந்த அவசியமில்லா நுகர்வுதான்.
அநாவசிய நுகர்வு
அநாவசிய அவசியமில்லா நுகர்வு என்றால் நடந்துபோகிற
தூரத்திற்கு காரில் செல்வது, எல்லோரும் வைத்திருக்கிறார்கள் என்பதற்காகவே அதிக விலைகொடுத்து
செல்போன் வாங்குவது, இரண்டுபேர் வாழ கடனுக்காவது நான்காயிரம் சதுர அடியில் மிகப்பெரிய
வீட்டை வாங்கிக்கொள்வது, அதில் அலங்காரத்திற்கென லட்ச லட்சமாய் செலவழித்துப் பொருள்களை
அடுக்குவது என அவசியமில்லாமல் வாங்கிக் குவித்துப் பயன்படுத்துகிற எல்லாமே தேவையில்லாத
அநாவசிய அவசியமில்லா நுகர்வுதான்.
அவசியமானதை
அதிகப்படுத்திக் கொள்ளும் வாழ்க்கை
“மினிமலிஸ்டுகள்
குறைவோடு வாழ்பவர்கள் இல்லை. அதிக நேரம், அதிக மகிழ்ச்சி, அதிக சேமிப்பு, அதிக படைப்பாற்றல்
என தங்களுடைய வாழ்வில் அவசியமானதை அதிகப்படுத்திக்கொள்கிற வாழ்வையே வாழ்கிறார்கள்” என்பது ஜோஷூவாவின் கருத்து.
நம்மிடமும்
இருக்கும் மினிமலிஸம்
மினிமலிஸம் என்கிற பெயரெல்லாம் இல்லாத காலத்திலேயே
நம்முடைய பெற்றோர்களும் முன்னோர்களும் அப்படித்தான் வாழ்ந்துகொண்டிருந்தார்கள். வீட்டில்
தேவையில்லாமல் ஒரு பல்ப் எரிந்தால்கூட ஓடிச்சென்று அணைக்கிற பெரியவர்களை இப்போதும்
நம் வீடுகளில் காண முடியும். அதுதான் நம்ம வீட்டு மினிமலிஸம். இதுபோன்ற சின்னச் சின்ன
சேமிப்புகளின் வழியாக நம் முன்னோர்கள் தங்களுடைய நிம்மதியான வாழ்வைக் கட்டமைத்தார்கள்.
மில்லியனர்
மினிமலிஸ்ட்கள்
உலகின் மிகப்பெரிய கோடீஸ்வரர்கள் என அறியப்படுகிற
பலரும் மினிமலிஸ்டுகள்தான் என்பது ஆச்சரியமான ஒன்றாக இருக்கலாம். ஆனால் அதுதான் உண்மையாகும்.
உலகப் பணக்காரர்களில் ஒருவரான வாரன் பஃபெட் அதற்கு நல்ல உதாரணம் ஆவார். கோடிகளைக் குவிப்பதற்கு
முன்பு எப்படிப்பட்ட வாழ்க்கையை வாழ்ந்தாரோ அப்படியேதான் அவர் இன்றுவரை இருக்கிறார்.
1958 இல் நெப்ராஸ்காவில் வாங்கிய அதே சிறிய வீட்டில்தான் இன்னமும் வசிக்கிறார். “தினமும் எதைச் செய்தால் மகிழ்ச்சியாக இருக்குமோ
அதையே செய்யுங்கள். அதுதான் உலகில் மிகப்பெரிய ஆடம்பரம்” என்கிறார் வாரன் பஃபெட். அவர் மட்டுமல்ல, ஸ்டீவ் ஜாப்ஸ், மார்க் சக்கர்பெர்க்
என மினிமலிஸ மில்லியனர்கள் உலகில் அதிகம்.
மினிமலிஸ
வாழ்க்கைக்கான 5 வழிகள்
மினிமலிஸ
வாழ்க்கை வாழ்வதற்கான ஐந்து விசயங்களை ஜோஷுவா குறிப்பிடுகிறார். அவற்றை ஒவ்வொன்றாகக்
காண்போம்.
1. பட்ஜெட்
போட்டு வாழப் பழகுதல்
மினிமலிஸ வாழ்க்கையில் முக்கியமானது இதுதான். நம்முடைய
வரவுக்கு மேல் ஒரு பைசாக்கூட செலவழிக்கக் கூடாது. அதற்கு ஒரே வழி திட்டமிடல். செலவழிக்கிற
ஒவ்வொரு ரூபாய்க்கும் கணக்கு வைத்துக்கொள்ள வேண்டும்.
2. குறைவான
பொருள்களில் வாழ்வது
வீட்டு பீரோவில் 30 சட்டைகள் இருக்கும்.
இணையத்தில் புதிய சலுகை ஒன்றைப் பார்த்ததும் இன்னொரு சட்டை வாங்க ஆசை வரும். அப்படி
இல்லாமல் நம்மிடம் என்னென்ன பொருள்கள் இருக்கின்றன, அதை எவ்வளவு அதிகமாகப் பயன்படுத்துகிறோம்
என்பதைப் பட்டியலிட்டு வைத்துக்கொள்வது அவசியம். இதனால் அவசியமில்லாமல் இருக்கிற பொருள்களை மீண்டும்
மீண்டும் வாங்குவதைத் தடுத்துக் கொள்ளலாம்.
3. வருங்காலத்திற்குத்
திட்டமிடல்
வருங்காலத்துக்குத் தேவையான முன்னேற்பாடுகள் மிக
மிக முக்கியம் ஆகும். மாதந்தோறும் வரவு செலவு விவரங்களைக் கட்டாயம் பொறுமையாக வாசித்து
எது தேவை தேவையில்லை என்பதை முடிவு செய்து அடுத்தடுத்த மாதங்களில் கட்டுப்படுத்த வேண்டும்.
வருமானத்தில் குறிப்பிட்ட தொகையை வெவ்வேறு முதலீட்டுத் திட்டங்களில் போட்டுவைப்பது
அவசியம் ஆகும்.
4. ஒவ்வொரு
வாங்குதலையும் கேள்வி கேட்பது
எதை வாங்குவதாக இருந்தாலும் அதை வாங்குவதற்குமுன்
இது எனக்கு அவசியம்தானா? இது இல்லாமல் வாழ முடியுமா? என்ற கேள்விகளை எழுப்பிக் கொள்ள
வேண்டும். ஒன்றை வாங்குவது அவசியமில்லை என்று தோன்றினால் அதை வாங்க வேண்டியதில்லை.
ஒரு பொருள் இல்லாமல் வாது முடியும் என்றால் என்றால் அதை வாங்க அவசரம் காட்ட வேண்டியதில்லை.
5. அடுத்தவர்களுக்கு வழங்குவது
உலகில் மிகப் பெரிய மகிழ்ச்சி அடுத்தவர்களுக்கு உதவுவதுதான்
என்பது வாரன் பஃபெட் தொடங்கி பில்கேட்ஸ் வரைக்கும் அத்தனை பேரும் பின்பற்றுகிற மகிழ்ச்சிக்கான
ரகசிய வழிமுறையாகும். மாதந்தோறும் முடிந்த அளவு தொகையைப் பிறருக்கு கொடுங்கள். அது
உங்களைத் திருப்தியாக வாழவைக்கும்.
மினிமலிஸத்தின்
அழைப்பு
மேற்கூறிய ஐந்து கட்டளைகள் நம்முடைய செலவுகளைக் குறைப்பதுடன்
சேமிப்பையும் அதிகப்படுத்தும். குறைந்த செலவில் திருப்தியான வாழ்வை வாழ உதவும். இப்படித்தான்
நம் முன்னோர்கள் வாழ்ந்தார்கள். அதனால்தான் அவர்களால் சிறிய வருமானத்திலும் சிறப்பாக
வாழமுடிந்தது. அவ்வண்ணம் வாழ அழைப்பதுதான் மினிமலிஸ வாழ்க்கை முறை. இப்போது சொல்லுங்கள்
இது போன்ற கருத்துகளை எத்தனை முறை வாசித்தாலும் அது வாழ்க்கைக்குப் பயனுள்ளதுதானே!
பயனுள்ள இந்தப் பகிர்வைப் பலருக்குப் பகிர்ந்து நீங்களும் தினந்தோறும் படியுங்கள்.
உங்கள் மனதில் உங்களை அறியாமல் ஒரு மாற்றம் உண்டாகும்.
*****
இதனை PDF ஆகப் பதிவிறக்கம் செய்து கொள்ள விரும்பினால் கீழே உள்ள
இணைப்பைச் சொடுக்கவும்.
Click Here to Download
