அமானுஷ்யங்களின் அட்ரஸ்
அட்ரஸ் – 100
ஆவி அடங்கும் முடிவுரை!
இவ்வலைப்பூவின் அன்பான வாசகர்களே! அமானுஷ்யங்களின் அட்ரஸ் என்ற தொடரின் மூலமாக நாம் கடந்து வந்த பாதை சாதாரணமானதல்ல.
நிழல்களின் நிஜம் தேடியும், வெளிச்சத்திற்குள் ஒளிந்திருக்கும் இருளைப் பார்த்தும்
நாம் மேற்கொண்ட இந்த அமானுஷ்யப் பயணம், இன்றோடு ஒரு நிறைவான முற்றுப்புள்ளியை எட்டுகிறது.
அமானுஷ்யங்களின் அட்ரஸ் வெறும் பேய்க்கதைகளின் தொகுப்பு அல்ல; அது நம் அறியாமைக்கும்
அறிதலுக்கும் இடைப்பட்ட எல்லைக் கோடு. நாம் எதை நம்ப மறுக்கிறோமோ, அல்லது எதை விளக்க
முடியவில்லையோ, அதைத்தான் உலகம் அமானுஷ்யம் என்று முத்திரை குத்துகிறது. ஆனால், உண்மை
என்னவென்றால், இயற்கையின் பிரம்மாண்டத்தின் ஒரு துளியைத்தான் நாம் இதுவரை தொட்டுப்
பார்த்திருக்கிறோம்.
பேய், பிசாசு, அமானுஷ்யம், ஏழாம் அறிவு, எட்டாம் அறிவு, ஒன்பதாம்
அறிவு,… என இவற்றைத் தாண்டியும் அறிவியல் வெளிச்சம் படாத மூலைகள் எவ்வளவோ இருக்கின்றன.
இவை பற்றிப் பேசத் தொடங்கினால் நம் ஊரில் கூட்டத்திற்குப் பஞ்சமே இருக்காது. அப்படித்தான்
ஆரம்பித்தோம் இந்தத் தொடரை. அமானுஷ்யங்களின்
அட்ரஸ் என்ற பெயரில். இதுவரை நாம் எத்தனையோ விசித்திரமான இடங்களுக்குச் சென்றோம்;
புரிந்துகொள்ள முடியாத மனிதர்களைச் சந்தித்தோம்; விளக்க முடியாத சம்பவங்களை அலசிப்
பார்த்தோம். இன்று இதோ, இந்தத் தொடரின் கடைசிப் பக்கத்திற்கு வந்துவிட்டோம்.
இந்தத் தொடரில் நாம் பார்த்த கதைகள், சம்பவங்கள், செய்திகள்,
விளக்கங்கள் எல்லாமே ஏதோ ஒரு புள்ளியில் நம் மனதுடன் தொடர்புடையவை. சில உண்மைகள், பல
கற்பனைகள், இன்னும் சில நம் நரம்புகளை முறுக்கேற்றும் விறுவிறுப்பான அனுபவங்கள். எத்தனையோ
வாசகர்கள் மின்னஞ்சல் மூலமாகவும், கமெண்ட் பகுதியிலும் தங்கள் சொந்த அனுபவங்களைப் பகிர்ந்து
கொண்டனர். சிலர், "ஐயா! என் வீட்டிலும் இப்படி ஒரு நாள் நடந்தது..." என்று
அலைபேசியில் ஆரம்பிப்பார்கள். அதைக் கேட்டு விட்டு, நள்ளிரவில் தனியாகப் படுக்கப் போகும்போது,
லேசாக ஒரு பயம் தொற்றிக்கொள்ளும். அந்தப் பயம் இருக்கிறதே. அது ஒரு சுகமான போதை! அந்தப்
போதை தரும் கிக்தான் அமானுஷ்யம்.
பேய்கள் இருக்கின்றனவா? ஆவிகள் அலைகின்றனவா? பிசாசுகள் திரிந்து
கொண்டிருக்கின்றனவா? இல்லை, இல்லவே இல்லை. நமது பயம்தான் பேயாக, ஆவியாக, பிசாசாக உருவெடுக்கிறது.
உண்மை எப்போதும் ஒரு புதிரான திரை போட்டுத்தான் தன்னை மறைத்துக்கொண்டிருக்கும். அந்தத்
திரைதான் அமானுஷ்யங்களுக்கான புகலிடம். திரையை விலக்கினால் அமானுஷ்யங்கள் டாடா காட்டி
விடும்.
இந்த வலைப்பதிவில், இந்தத் தொடர் முழுவதிலும் என்னுடன் பயணித்த
அன்பான வாசகர்கள் நீங்கள். ஒவ்வொரு நாளும் புதிய அத்தியாயத்துக்காகக் காத்திருந்து,
விவாதித்து, விமர்சித்து, சிலாகித்து, உங்கள் ஆதரவுதான் இந்தத் தொடரை இவ்வளவு தூரம்
கொண்டு வந்து சேர்த்திருக்கிறது.
கதைகள் முடியும்; ஆனால் கேள்விக்குறிகள் முடிவதில்லை. அமானுஷ்யங்களின்
அட்ரஸ் எங்கு இருக்கிறது என்று கேட்டால், அது வேறு எங்கேயோ இல்லை. நமது ஆழ்மனதின் இருண்ட
அறைகளில்தான் இருக்கிறது.
இந்தத் தொடர் உங்களுக்கு ஏற்படுத்திய நடுங்க வைக்கும் பயம்,
சிந்திக்க வைத்த தருணம் மற்றும் முடிவில் கிடைத்த தெளிவு என இவை அனைத்தும் உங்களுடன்
நீடிக்கும் என்று நம்புகிறேன்.
ஒவ்வொரு அத்தியாயத்திலும் உங்கள் கருத்துக்களோடும், ஆதரவோடும்
என்னுடன் பயணித்த ஒவ்வொருவருக்கும் எனது மனமார்ந்த நன்றிகள்.
இப்போதைக்கு இத்தொடரிலிருந்து விடைபெறுகிறேன்.
அடுத்ததொரு புதிய முயற்சியில், இன்னும் சுவாரஸ்யமான களத்தில்
சந்திப்போம்.
நன்றி!
வணக்கம்!
முடிவாக, அட்ரஸைத்
தேடுவதற்கு ஒரு எண்ட் கார்டு போடுவோம்!
*****
