கொசுக்களும் நாமும்!

கொசுக்களும் நாமும்!

நாம் தரையில் உட்கார்ந்திருந்தாலும் சரி அல்லது கௌன்சிலர் நாற்காலியில் உட்கார்ந்திருந்தாலும் சரி திடீரென உங்கள் காதுக்கு அருகில் ஒரு ஹை பிட்ச் சவுண்ட் கேட்கிறது. ரேடாரில் சிக்காத பைட்டர் ஜெட் மாதிரி வந்து கடிக்கிறது. அது வேறொன்றுமில்லை, கொசுதான்!

இப்போது யோசித்துப் பாருங்கள். இந்த விநாடியில் நம்மைத் துளைத்துக் கொண்டிருக்கும் இந்தச் சின்னப் பூச்சி, மனித நாகரிகத்தின் வரலாற்றையே பல முறை புரட்டிப் போட்டிருக்கிறது என்பதுதான் வரலாறு சொல்லும் நிஜம்.

கி.மு. காலத்து ரோமப் பேரரசில், ஏதோ ஒரு குளத்து நீர்த் தேக்கத்தால் ரோம் நகரமே ஆட்டம் கண்டது. அப்போது யாருக்கும் தெரியாது, அந்தக் கண்ணுக்குத் தெரியாத எதிரி மலேரியா என்று. படைவீரர்கள் போர்க்களத்தில் எதிரிகளிடம் வீழ்ந்ததை விட, இந்தக் கிருமிகளைச் சுமந்து வந்த கொசுக்களின் கடியால் சரிந்து வீழ்ந்தனர்.

பத்தொன்பதாம் நூற்றாண்டின் இறுதி வரை கொசுவுக்கும் நோய்க்கும் என்ன சம்பந்தம் என்று யாருக்கும் தெரியாது. கெட்ட காற்று தாக்கியதால் தான் காய்ச்சல் வருகிறது என்று நம்பிக் கொண்டிருந்தார்கள். மலேரியா என்பதற்குக் கெட்ட காற்று என்பதுதான் அர்த்தம். மலேரியா என்பது இத்தாலி மொழிச் சொல்.

பின்னாளில், பிரிட்டிஷ் டாக்டர் ரொனால்ட் ரோஸ் செகந்திராபாத்தில் ஒரு மைக்ரோஸ்கோப்பை வைத்துத் தேடிப் பார்த்த பிறகுதான் உண்மை வெளியே வந்தது. அனாபிலஸ் கொசுக்களின் குடலில் மலேரியா ஒட்டுண்ணி இருந்தது. இதற்காக அவருக்கு 1902 ஆம் ஆண்டு நோபல் பரிசும் வழங்கப்பட்டது.

கொசு ஒன்றும் சும்மா வந்து ரத்தம் குடித்துவிட்டுப் போவதில்லை. அதனுடன் இலவச இணைப்பாக சில வைரஸ்களையும், ஒட்டுண்ணிகளையும் சேர்த்துத் தருகிறது.

மலேரியாவைப் பரப்பும் கொசு அனாபிலஸ் ரகம். வரலாற்றில் கோடிக்கணக்கான உயிர்களைக் காலி செய்த ஹிஸ்டாரிக் கில்லர் இதுதான்.

டெங்குவைப் பரப்பும் கொசு ஏடிஸ் எஜிப்டி. கறுப்பு வெள்ளை கோடுகளுடன் மாடர்ன் பேஷன் மாதிரி இருக்கும். பகலில் மட்டுமே வந்து கடித்து பிளேட்லெட்டைக் குறைக்கும் வில்லன் இது.

சிக்கன்குனியாவைப் பரப்பும் கொசு மூட்டு வலியைப் பரிசாகத் தரும். பைலேரியாவைப் பரப்பும் கியூலெக்ஸ் வகை கொசு யானைக்காலை உண்டாக்கும்.

இப்படிப்பட்ட கொசுவை விரட்ட பழங்காலத்தில் என்ன செய்தார்கள் தெரியுமா?

புகை போட்டார்கள். வேப்பிலையை எரித்தார்கள். சாம்பலைப் பூசிக்கொண்டார்கள். பிறகு காலங்கள் மாறின; தொழில்நுட்பம் வளர்ந்தது. டி.டி.டி வரை அடித்தார்கள். ஆரம்பத்தில் கொசுக்கள் செத்தன. பிறகு அவை டி.டி.டியை டிபன் மாதிரி சாப்பிட்டுவிட்டுத் தாக்குப் பிடிக்கத் தொடங்கின.

கொசுக்களுக்கு எதிரான தொழில்நுட்பங்கள் வளர்ந்தாலும் கொசுவலை என்பது எளிமையான, வலிமையான ஆயுதம்.

தற்போது கொசுவர்த்திகள், கரண்ட் காயில், லிக்யூடு வேப்ப எண்ணெய் வாசனை திரவியங்கள், அல்ட்ராசோனிக் சவுண்ட் ரிப்பலெட்டுகள் வரை வந்துவிட்டன. சொல்லப்போனால், பேட் வைத்து கொசுவை எலக்ட்ரிக் ஷாக் கொடுத்துக் கொல்லும் அளவுக்கு தொழில்நுட்பம் வளர்ந்துவிட்டது.

ஆனாலும், முடிவில் ஒன்று தெளிவாகிறது. மனிதன் நிலவுக்குப் போய்விட்டான், செவ்வாய்க்கு ராக்கெட் அனுப்புகிறான். ஆனால், இரண்டே மிமீ நீளமுள்ள ஒரு கொசுவிடம் இன்னும் திணறிக் கொண்டுதான் இருக்கிறான்.

சுற்றுப்புறத்தைத் தூய்மையாக வைத்திருப்பது ஒன்றே கொசுவிடமிருந்து தப்பிக்க இப்போதைக்கு இருக்கும் ஒரே வழி. தண்ணீரைத் தேங்க விடக் கூடாது. கொசுவை அண்ட விடக் கூடாது. இல்லை என்றால், அடுத்த தடவை காதுக்கு அருகில் அந்த ரீங்காரம் கேட்கும் போது, காய்ச்சல் என்று மருத்துவமனையை நோக்கி ஓட வேண்டியதுதான்!

*****